Tramp: KXDR sanksiyalar bekor qilinishini istadi, ammo AQSh rad etdi

Shimoliy Koreya tomoni Yonbendagi yadro obektini yo‘q qilish evaziga barcha sanksiyalar bekor qilinishini istadi, ammo AQShni bu holat qanoatlantirmadi, dedi AQSh prezidenti Donald Tramp Xanoyda bo‘lib o‘tgan KXDR-AQSh sammiti yakunlariga bag‘ishlangan matbuot anjumanida.

"Ular barcha sanksiyalar bekor qilinishini istashdi, biz rad etdik. Ular Yonbendagi yadro obektini yo‘q qilish evaziga biz barcha sanksiyalarni olib tashlashimizni istashdi, ammo bizni bu qanoatlantirmaydi", - dedi Tramp.

AQSh prezidenti "AQSh va Shimoliy Koreya o‘rtasidagi jarlikni bartaraf etish uchun vaqt kerakligini" aytdi hamda o‘tgan yilgi birinchi uchrashuvdan buyon uning va Kim Chen Inning qarashlari "ancha yaqinlashganini" ta'kidladi.

Tramp KXDRdan sanksiyalarni olib tashlashni va ushbu mamlakat iqtisodiy salohiyatining amalga oshishiga guvoh bo‘lishni xohlashini bildirdi.

Vetnam poytaxti Xanoyda bo‘lib o‘tgan ikki davlat rahbarlari uchrashuvida KXDR yetakchisi Kim Chen In yadrosizlanishni amalga oshirishga tayyor ekanini yana bir marotaba tasdiqladi.

“Agar men buni xohlamaganimda, bu yerga kelmagan ham bo‘lardim”, - dedi u amerikalik jurnalistning savoliga javob qaytarib.

Oq uy matbuot kotibi Sara Sanders so‘zlariga ko‘ra, tomonlar yadrosizlanishning turli variantlarini muhokama qilishgan, ammo hozircha ular kelishuvga erisha olmaganlar. Shu bilan birga, yetakchilar kelajakda uchrashish niyatida ekanini bildirgan.