Bobojonova: jurnalistlarning huquqlari ko‘p hollarda inobatga olinmayapti 

Jurnalistlarni qayta tayyorlash markazi direktori Gulnora Bobojonova jurnalistlarning huquqlari ko‘p hollarda inobatga olinmayotganini ma'lum qildi. Bu haqda Bobojonova 5 mart kuni Axborot va ommaviy kommunikatsiyalar agentligida tashkil etilgan davra suhbatida aytib o‘tgan.

«Ularning (jurnalistlar - tahr.) maqomini mustahkamlash uchun Jurnalistlar kasaba uyushmasini tashkil etish kerak. Ular madaniyat xodimlari kasaba uyushmasiga biriktirib qo‘yilgan. Vaholanki, jurnalistika kasbining xususiyatlari madaniyat va ta'limdan farq qiladi», — deya qayd etgan markaz direktori.

Jurnalistika sohasiga oid huquqiy-normativ aktlarga o‘zgartirish kiritish orqali ularni takomillashtirish bo‘yicha tashkil etilgan davra suhbatida Bobojonova «ko‘p hollarda jurnalistlarga ham huquqiy savodxonlik» yetishmasligini ta'kidlagan. 

Uning aytishicha, jurnalistlar qonunlar bilan tanish emas. Bu borada jurnalistlar malakasini oshirishga ko‘proq e'tibor qaratish kerak, deb hisoblaydi Jurnalistlarni qayta tayyorlash markazi direktori.

Avvalroq, Axborot va ommaviy kommunikatsiyalar agentligi direktori  OAV faoliyatiga asossiz aralashuvidan ogohlantirish, OAV hamda davlat idoralari, jismoniy, yuridik shaxslar o‘rtasidagi nizoli holatlarni hal qilish bilan shug‘ullanuvchi Media-ombudsmen instituti tashkil etilishini bildirgandi.