Gulnora Karimova qamoqqa qaytarildi. U qancha vaqt koloniyada bo‘ladi?

O‘zbekistonning birinchi prezidenti Islom Karimovning katta qizi Gulnora Karimova 5 mart kuni uy qamog‘idan umumiy rejimdagi koloniyaga o‘tkazildi.

Bosh prokuratura ma'lumotiga ko‘ra, Gulnora Karimova jinoiy yo‘l bilan orttirilgan pullarni hamda davlatga yetkazilgan zararni qaytarish majburiyatini o‘z zimmasiga olgach, unga 2017 yil dekabrida belgilangan 10 yilga ozodlikdan mahrum etish jazosi 5 yilga ozodlikni cheklash jazosiga (uy qamog‘iga) almashtirilgandi.

Lekin uy qamog‘ida o‘tirgan Gulnora Karimova O‘zbekistonga yetkazilgan zararni qoplashga faol qarshilik qilgan. U shuningdek turar-joyni tark etmaslik, aloqa va internet vositalaridan foydalanmaslik kabi cheklovlarni ham qo‘pollik bilan buzgan. Xususan, u 2018 yilning 22 noyabr kuni yashash joyidan o‘zboshimchalik bilan chiqib ketganida jazoni o‘tash tartibi va shartlarini buzmaslik haqida ogohlantirilgandi.

«IIV Jazoni o‘tash bosh boshqarmasi huzuridagi Probatsiya xizmati taqdimnomasi asosida jazoni o‘tash talabi va shartlarini qo‘pol ravishda buzgani sababli jinoyat ishlari bo‘yicha Yashnobod tumani sudi tomonidan G.Karimovaga nisbatan tayinlangan jazoning qolgan qismini jinoyat-ijro qonunchiligiga muvofiq umumiy rejimdagi koloniyada o‘tash jazosiga almashtirish to‘g‘risida ajrim chiqarildi», – deyiladi Bosh prokuratura tarqatgan xabarda.

Qayd etish kerakki, Gulnora Karimova ishi uning qizi Imon Karimova 5 mart kuni o‘zining «Instagram»dagi sahifasida ularning Toshkentdagi kvartirasiga prokuratura xodimlari bostirib kirib, dastlab onasiga tahdid qilishgani, so‘ng uni noma'lum tomonga olib ketishganini aytganidan so‘ng yana ko‘tarildi.

«Ayni paytda u qayerda ekanligini va unga nima qilganligini hech kim bilmaydi, ammo Shveytsariyadagi advokatlar va prokurorlar xabardor qilingan va ular choralar ko‘rmoqda», — deb yozdi Imon.

Karimovaning Jyenevadagi advokati Greguar Manja o‘z tvitterida nufuzli nashrlarga murojaat qilib, holatga e'tibor qaratishni so‘ragan.

Imon Karimova avval ham bir necha marta ijtimoiy tarmoqda onasi haqida ma'lumot bergan, bir safar onasi bilan tushgan selfisini joylashtirgan, boshqa safar onasi oshxonada chuchvara pishirayotgani aks etgan animatsion suratni tarqatgandi.

Fevral oyida ham Karimovaning o‘g‘li Islom «Instagram»da tergovchilar onasiga bosim o‘tkazayotgani, unga tibbiy yordamlar ko‘rsatilmayotgani haqida yozgandi.

Bosh prokuratura ikki holatda ham da'volarni rad etib Gulnora Karimova tayinlangan jazoni belgilangan tartibda o‘tayotganini ma'lum qilgandi.

O‘zbekiston Bosh prokuraturasi Imon Karimovaning oxirgi posti yuzasidan ham izoh berib, bu bayonot haqiqatga zid ekanini, joylashtirilgan fotosuratlar esa eskiligi ma'lum qilgan. Shundan bir necha soat o‘tib esa bosh prokuratura Gulnora Karimova umumiy tartibli koloniyaga o‘tkazilganini ma'lum qildi.

2013 yilda O‘zbekistonning ijtimoiy-siyosiy hayotidan chekingan Gulnora Karimova faqat ijtimoiy tarmoqlardagi chiqishlari bilan ma'lum edi, 2014 yildan keyin esa u umuman omma ko‘z o‘ngidan g‘oyib bo‘ladi. 2016 yilning kuzida otasi Islom Karimov vafot etganida ham u dafn marosimida ko‘rinish bermaydi.

2017 yilning yozida O‘zbekiston Bosh prokuraturasi Gulnora Karimova ishi bo‘yicha ma'lumot bergan, unga ko‘ra Gulnora Karimova 2015 yilning avgustida, ya'ni birinchi prezident Islom Karimov davrida qator moliyaviy jinoyatlarda aybdor deb topilgani va unga 5 yil muddatga ozodlikni cheklash jazosi tayinlangani ma'lum bo‘lgandi.

Keyinroq Gulnora Karimovaga nisbatan firibgarlik, xorijiy valutani yashirish, bojxona qonunchiligini buzilishi bo‘yicha yana bir jinoiy ish qo‘zg‘atilgani ma'lum qilindi.

Jinoyat ishlari bo‘yicha Toshkent viloyati sudining 2017 yil 18 dekabrdagi hukmi bilan unga 10 yil ozodlikdan mahrum qilish jazosi tayinlangan. 

O‘zbekistonning yangi hukumati insonparvarlik nuqtai nazaridan hamda mahkuma jinoiy yo‘l bilan orttirilgan pul mablag‘larini qaytarish va davlatga yetkazilgan zararni qoplash majburiyatlarini o‘z zimmasiga olganini e'tiborga olgan holda Gulnora Karimovaga imkon berdi va jinoyat ishlari bo‘yicha Toshkent viloyati sudining 2018 yil 1 iyuldagi ajrimi bilan Karimovaga tayinlangan jazo 5 yil muddatga ozodlikni cheklash jazosiga almashtirildi.

Keyingi vaqtlarda Gulnora Karimova o‘z qizi Imon bilan bir uyda yashab keldi, Imon ham ijtimoiy tarmoqdagi chiqishlarida onasi muddatidan oldin shartli ravishda ozod qilinganidan keyin, 2018 yil iyuni oxiridan buyon Toshkent shahri hududidagi xonadonda yashayotganini tasdiqlagandi.

Biroq Gulnora Karimova qonunlarni buzishda davom etdi va o‘ziga berilgan imkonni yo‘qotdi. U o‘tgan davrda bo‘lgani kabi qonunlarni mensimaslikni oddiy holatdek bilib, cheklovlarni buzdi. 

Natijada, jazoni o‘tash tartibi va shartlarini qasddan buzgan Gulnora Karimova endi unga nisbatan tayinlangan jazoning o‘talmay qolgan muddatini - 4 yildan ortiqroq muddatni umumiy tartibli koloniyada o‘taydi.

O‘zbekiston Bosh prokuraturasi Gulnora Karimovani trillionlab so‘m daromadni soliqdan yashirganlik, o‘zgalarning trillionlab so‘mlik mulkini tovlamachilik bilan tortib olish va qariyb 2 milliard AQSh dollarini xorijda berkitish kabi jinoyatlarda ayblangan.

Tergov ma'lumotlariga ko‘ra, Karimova jinoiy sheriklari yordamida 12ta xorijiy mamlakatda 1,3 milliard AQSh dollar, 63,5 million yevro, 27,1 million funt va 18,5 million frank miqdorida aktivlarni qonuniylashtirgan.

Shveytsariya 2012 yili Jyeneva va Tsyurixdagi banklarda Gulnora Karimovaga qarashli ekani gumonlanaëtgan 800 million frankni muzlatib qo‘ygan. Shveytsariya prokuraturasi bu pulning 686,7 millionini musodara qilish va O‘zbekistonga qaytarish to‘g‘risida qaror chiqargan. Biroq hozircha bu pullarning O‘zbekistonga qaytarilish muddati aniq emas.