Davlat bojxona qo‘mitasi Kontrabanda va bojxona qonunchiligi buzilishiga qarshi kurashish boshqarmasi xodimlari “Toshkent-tovar” Tashqi iqtisodiy faoliyat bojxona posti vakillari bilan hamkorlikda to‘lovlardan bo‘yin tovlash maqsadida boshqa tovar nomi ostida olib kirilgan tovar moddiy boyliklarning noqonuniy aylanmasiga o‘z vaqtida chek qo‘yishdi.
Xususan, xorijdan poytaxtimizdagi mas'uliyati cheklangan jamiyatlardan biriga olib kelingan mahsulotlar saqlanayotgan konteynerlar tekshirilganda, konteynerlarda hujjatda ko‘rsatilmagan boshqa turdagi tovarlar mavjudligi aniqlandi.
Ya'ni konteynerlarda “sintetik kompleks iplardan to‘qilgan gazlamalar” mahsuloti o‘rniga “sintetik tolali matolar” to‘qimachilik mahsulotlari mavjudligi fosh etildi.
Qonunbuzar qiymati 1,2 milliard so‘mdan ortiq, 147 474 metr to‘qimachilik matolarini boshqa nom ostida yashirish yo‘li bilan imtiyozdan foydalanmoqchi bo‘lgani fosh etildi.
Hozirda yuqoridagi holat yuzasidan bojxona tekshiruvlari davom ettirilmoqda.
