O‘zbekiston delegatsiyasi «ShHT – Afg‘oniston» muloqot guruhining majlisida ishtirok etdi

19 aprel kuni Bishkek shahrida O‘zbekiston Respublikasi Prezidentining Afg‘oniston bo‘yicha maxsus vakili Ismatulla Irgashev boshchiligidagi delegatsiya “ShHT – Afg‘oniston” muloqot guruhining yig‘ilishida ishtirok etdi. Bu haqda O‘zbekiston TIV matbuot xizmati xabar berdi.

Xabarda aytilishicha, Shanxay hamkorlik tashkilotiga a'zo-mamlakatlar vakillari Afg‘oniston tashqi ishlar vaziri Salohuddin Rabboniy rahbarligidagi delegatsiya bilan birgalikda Afg‘onistondagi vaziyat yuzasidan fikr almashdilar. “ShHT – Afg‘oniston” shaklidagi hamkorlikni mustahkamlash yuzasidan takliflar muhokama qilindi.

O‘zbekiston delegatsiyasi rahbari o‘z nutqida O‘zbekiston Afg‘onistonda ziddiyatni hal qilish bo‘yicha xalqaro sa'y-harakatlarni faollashtirishni ma'qullashi va qo‘llab-quvvatlashini ta'kidladi, deyiladi xabarda.

“Biz Afg‘onistondagi siyosiy jarayonlar faqat afg‘onlar tomonidan va afg‘on xalqi boshchiligida amalga oshirilishi shart degan asosiy tamoyil tarafdori bo‘lib qolamiz. Kurashuvchi tomonlar o‘rtasida kelishuvga erishishda huquqni muhofaza qilish, fuqarolik jamiyatini yanada rivojlantirish, ayollar huquqlarini himoya qilish kabi sohalar bo‘yicha davlat institutlarini saqlab qolish muhim hisoblanadi” , – dedi Ismatulla Irgashev.

Qayd etilganidek, tomonlarni yarashtirish bo‘yicha sa'y-harakatlar bilan bir qatorda O‘zbekiston Afg‘onistonning iqtisodiy kelajagiga, mamlakatdagi ijtimoiy barqarorlikka va Afg‘onistonning yosh avlodiga investitsiya kiritmoqda. Afg‘onistonda transport va logistika, energetika, savdo va ta'lim sohalarida yirik loyihalar amalga oshirilmoqda. O‘zbekiston tomonidan “Surxon–Puli-Xumri” elektr uzatish tarmog‘ining qurilishi, Termiz shahrida Afg‘oniston fuqarolarini o‘qitish ta'lim markazi va bojxona terminaliga ega bo‘lgan “Termiz-Kargo” logistika markazining ochilishi, “Mozori-Sharif–Hirot temir yo‘li qurilishi” loyihasining ishlab chiqilishi shular jumlasidandir.

Xabarda ta'kidlanishicha, O‘zbekiston afg‘on xalqi uchun muhim bo‘lgan boshqa loyiha – “Mozori Sharif–Kobul–Peshavor” temir yo‘li qurilishida Afg‘oniston, Qozog‘iston, Pokiston va Rossiya bilan yaqindan hamkorlik qilmoqda. Mazkur temir yo‘li Markaziy va Janubiy Osiyoni bog‘laydi hamda turli mamlakatlar, jumladan ShHTga a'zo davlatlar o‘rtasida yaqin iqtisodiy aloqa o‘rnatishga yordam beradi.

Bundan tashqari, joriy yilda Toshkent shahrida Mintaqaviy iqtisodiy hamkorlikka bag‘ishlangan sakkizinchi xalqaro konferensiyaning vazirlar uchrashuvini o‘tkazish rejalashtirilmoqda.

Majlisda Afg‘onistonda mustahkam tinchlik o‘rnatishda “ShHT – Afg‘oniston” muloqot guruhi o‘z hissasini qo‘shishiga ishonch bildirildi.

Bishkek shahrida bo‘lish chog‘ida O‘zbekiston Prezidentining Afg‘oniston bo‘yicha maxsus vakili Ismatulla Irgashev “ShHT-Afg‘oniston” muloqot guruhi majlisida ishtirok etayotgan delegatsiyalar rahbarlari – Xitoy TIVning tashqi xavfsizlik bo‘yicha maxsus vakili Chen Gopin, Hindiston tashqi ishlar vaziri o‘rinbosari Gitesh Sharma bilan ikki tomonlama uchrashuvlar o‘tkazdi.

Afg‘onlararo tinchlik jarayonini boshlash va Afg‘onistonda infratuzilmaviy, ijtimoiy-iqtisodiy loyihalarni amalga oshirish doirasidagi hamkorlik masalalari muhokama qilindi.