2 may kuni Toshkentdagi Wyndham mehmonxonasida “MDH – Islom bankchiligi va moliyasi bo‘yicha forum – 2019” boshlandi. 3-4 may kunlari esa «Islom bankchiligi, takaful va islom mikromoliyasi» mavzuida katta seminar ham tashkil etiladi.
Mazkur tadbirni tashkil etishdan ko‘zlangan asosiy maqsad, o‘zbekistonlik tadbirkorlarni Islom bankchiligi va moliyasi sohasi bilan tanishtirish, ularni ushbu soha imkoniyatlaridan xabardor qilish, boshqa mamlakatlardan tashrif buyurishi kutilayotgan mutaxassislar, amaliyotchi-olimlar va boshqa mehmonlar bilan ushbu sohada yuz berayotgan yangiliklar bilan bo‘lishishdan iborat.
Ushbu forum va ikki kunlik seminar “Al Huda” islom bankchiligi va iqtisodiyoti markazi, “Sheikh Ahmed Bin Obeid Al Maktoum” xalqaro investitsion kompaniyasi hamda Islom taraqqiyot bankining ICD tarmog‘i bilan hamkorlikda o‘tkazilmoqda.
Forumda islom bank - moliya sohasidagi tarixiy voqealar, global g‘oya va yo‘nalishlar, takaful (islom sug‘urtasi), O‘zbekistonning islom bank - moliya tarmog‘ini rivojlantirishdagi imkoniyatlari va bu yo‘nalishdagi aniq vazifalar kabi mavzularda taqdimotlar o‘tkazilmoqda.
2018 yil may oyida O‘zbekistonda islom bank ishi va infratuzilmasini joriy etishga qaratilgan O‘zbekiston prezidentining qarori loyihasi ochiq muhokamaga qo‘yilgan edi. Qaror loyihasida tadbirkor va fuqarolarda foiz yukiga ega bo‘lmagan bank-moliya hizmatlariga bo‘lgan qiziqish va zaruriyat ortib borayotgani qayd etilgan. Shuningdek, islom bank ishi va moliyasi tamoyillarini ishlab chiqish va tatbiq etish bo‘yicha Komissiya tuzilishi ham ma'lum qilingan.
O‘zbekistonda islom bank-moliya tizimini tatbiq etish va rivojlantirishni keng muhokama qilish maqsadida tashkil etilayotgan forum butun mintaqada “Halol” bozorining tarkibiy qismi bo‘lgan islom bank-moliya tizimi rivojlanishiga turtki berishi kutilmoqda.
