IIBB bozorlar atrofidagi yo‘llarni tartibga keltirishni boshladi. Haydovchilar, piyodalar va savdo bilan shug‘ullanayotganlar jarimaga tortilmoqda

“IIBB: xalq bilan muloqot (Toshkent)” guruhiga bir vaqtning o‘zida fuqarolardan poytaxtdagi yirik bozorlar atrofidagi yo‘llardagi harakatni tartibga keltirish bo‘yicha bir nechta murojaatlar kelib tushdi, deb xabar bermoqda IIBB.

Ayniqsa, noroziliklar “Toshkent ipak yo‘li” (“Abu-Saxiy”), “O‘rikzor”, “Farhod”, “Qo‘yliq”, “Yunusobod” va boshqa bozorlar yaqinidagi harakatlarga taalluqli bo‘lgan.

Odamlar o‘z murojaatlarida, bozordagilar avtomobillarini ikki, hattoki uch qator qilib qoldirishlaridan va ularni deb avtobuslar bekatga yaqinlasha olmasliklaridan norozi bo‘lgan. Piyodalar ham piyodalar yo‘lakchasigacha 200-300 metr yurishga erinib yo‘lni xohlagan joylaridan kesib o‘tib, avariyaviy holat keltirib chiqarishmoqda.

Shanba, 25 may kunidan boshlab Toshkentning barcha yirik 14 ta bozorlari yaqinida YPX, PPX xodimlaridan va O‘zbekiston Respublikasi Milliy gvardiyasi xodimlaridan tashkil topgan qo‘shimcha guruhlar xizmat olib borishmoqda.

To‘xtash va to‘xtab turish qoidalarini buzgan haydovchilarga, belgilanmagan joydan yo‘lni kesib o‘tgan piyodalarga, yo‘l chetida va yer-osti yo‘laklarda noqonuniy savdo bilan shug‘ullanuvchi shaxslarga nisbatan choralar ko‘rilmoqda. U yerda savdo qiladiganlar tomonidan yo‘lak ifloslantirilishi sababli odamlar yer-osti yo‘laklaridan foydalanishni istashmaydilar.

Bundan tashqari, fuqarolarga qulaylik yaratish maqsadida bir qator takliflar tayyorlanmoqda, xususan, bozorlar yaqinida ko‘p qavatli avtoturargoh yoki bozorga keladigan avtomobillarni o‘rtacha sonini sig‘dira oladigan to‘lovli turargohlar qurish.