Qo‘qon davlat pedagogika instituti Boshqird davlat pedagogika universiteti bilan hamkorlik qiladi

O‘zbekiston Respublikasi va Rossiya Federatsiyasining ta'lim tizimlari hamkorligi doirasida Miftaxetdin Akmulla nomidagi Boshqird davlat pedagogika universiteti rektori Sagitov Salavat Talgatovich rahbarligidagi delegatsiya Qo‘qon davlat pedagogika institutiga tashrif buyurdi.

Tashrif doirasida ikki oliy ta'lim muassasalari o‘rtasida imzolangan Memorandumga asosan qo‘shma ta'lim dasturi asosida tashkil etilayotgan Rus tili va adabiyoti hamda Defektologiya (Logopediya) ta'lim yo‘nalishlari bo‘yicha istiqbolli rejalar, hamkorlikda ilmiy-tadqiqot ishlari, professor-o‘qituvchilar va talabalar almashinuvi muhokama etilib, shartnoma va qo‘shimcha kelishuv Dasturlari imzolandi. Muzokaralar davomida Boshqird davlat pedagogika universiteti Boshqird filologiyasi fakulteti talabalari uchun “O‘zbek tili va adabiyoti” fanini o‘qitishni yo‘lga qo‘yish, 2020-2021 o‘quv yilidan boshlab Boshqird davlat pedagogika universitetida Qo‘qon davlat pedagogika instituti bilan hamkorlikda qo‘shma fakultetni tashkil etish muhokama etildi.

Shundan so‘ng delegatsiya a'zolari institutda professor-o‘qituvchilar hamda talabalarning ilmiy-tadqiqot faoliyati yuritishlari, tajriba orttirishlari va ta'lim olishlari uchun yaratilgan shart-sharoitlar bilan tanishdilar hamda Qo‘qon davlat pedagogika institutida qo‘shma ta'lim dasturi doirasida tashkil etilgan tayyorlov kursi tinglovchilari bilan suhbatlashdilar.

Shu o‘rinda aytib o‘tish joizki, Qo‘qon davlat pedagogika instituti va Boshqird davlat pedagogika universiteti o‘rtasida 2018 yilda imzolangan Memorandumga asosan qo‘shma ta'lim dasturi asosida tashkil etilayotgan Rus tili va adabiyoti hamda Defektologiya (Logopediya) ta'lim yo‘nalishlariga 2019-2020 o‘quv yilidan abituriyentlar hujjat topshirishlari mumkin. Hozirgi kunda ushbu ta'lim yo‘nalishlari bo‘yicha tayyorlov kurslari faoliyat olib bormoqda.

Joriy yilning 21 may kunidan boshlab bir hafta davomida talaba almashinuvi dasturi doirasida Qirg‘iziston Respublikasi Qirg‘iz-o‘zbek universiteti Maktabgacha ta'lim kafedrasi mudiri Qodirova Maqaddam Sayramovna boshchiligida Tarix-filologiya fakultetining 10 nafar talabalari Qo‘qon davlat pedagogika institutida o‘quv mashg‘ulotlarida ishtirok etayotganligi ham sohada olib borilayotgan ishlarning uzviy davomidir.

Reklama huquqi asosida