Tadbirkorlik sub'yektlari bo‘yicha prezident farmoni qabul qilinadi. Qator tartiblarni bekor qilish rejalashtirilmoqda 

Normativ-huquqiy hujjatlar loyihalari muhokamasi portalida “Tadbirkorlik sub'yektlarini tugatish tartib-taomillarini soddalashtirish chora-tadbirlari to‘g‘risida”gi prezident farmoni loyihasi joylashtirildi.

Hujjat bilan O‘zbekiston Respublikasi prezidenti huzuridagi Tadbirkorlik sub'yektlarining huquqlari va qonuniy manfaatlarini himoya qilish bo‘yicha vakil, Davlat soliq qo‘mitasi va Adliya vazirligining 2020 yil 1 yanvardan boshlab:

moliya-xo‘jalik faoliyatini amalga oshirmayotgan va (yoki) qonunchilikda belgilangan muddatlarda o‘zlarining ustav jamg‘armalarini shakllantirmagan korxonalarni tugatish bo‘yicha doimiy ishlovchi maxsus hududiy komissiyalarni tugatish;

davlat organlari o‘rtasida elektron axborot almashinuvini joriy etish orqali tadbirkorlik sub'yektlarini tugatish jarayonidagi ortiqcha hujjatlar va tartib-taomillarni qisqartirish;

davlat ro‘yxatidan o‘tkazilgan paytdan e'tiboran bir yil ichida ustav fondi ta'sis hujjatlarida nazarda tutilgan miqdorda shakllantirilmaganligi uchun tadbirkorlik sub'yektlarini tugatish tartibini bekor qilish to‘g‘risidagi takliflariga rozilik berilishi mumkin.

2020 yil 1 yanvardan boshlab shunday tartib joriy etiladiki, unga muvofiq:

a) tadbirkorlik sub'yektlari – yuridik shaxslarni ixtiyoriy tugatishda:

bir yoki bir necha davriy bosma nashrlarda korxonaning tugatilishi to‘g‘risida e'lonlar berish talab etilmaydi, bunda tegishli ma'lumotlar ro‘yxatdan o‘tkazuvchi organning rasmiy saytiga joylashtiriladi;

davlat ro‘yxatidan o‘tkazilgan vaqtdan boshlab moliya-xo‘jalik faoliyatini amalga oshirmagan hamda soliq qarzi mavjud bo‘lmagan korxonalarning moliya-xo‘jalik faoliyati tekshirilmaydi;

davlat soliq xizmati organlari tomonidan o‘tkaziladigan, tugatiladigan korxonaning moliya-xo‘jalik faoliyatini tekshirishning eng uzoq davriyligi uch yilni tashkil etadi;

vakolatli davlat organlaridan korxona to‘g‘risidagi mavjud ma'lumotlar olish Tadbirkorlik sub'yektlarini davlat ro‘yxatidan o‘tkazish va hisobga qo‘yishning avtomatlashtirilgan tizimi orqali amalga oshiriladi;

korxonani ixtiyoriy tugatishning umumiy muddati ro‘yxatdan o‘tkazuvchi organ ixtiyoriy tugatish to‘g‘risida xabardor qilingan kundan boshlab olti oydan oshmasligi kerak;

b) tadbirkorlik sub'yektlari – jismoniy shaxslar faoliyatini to‘xtatishda ariza beruvchi tomonidan davlat soliq xizmati organining soliqlar va boshqa majburiy to‘lovlar bo‘yicha qarzi yo‘qligi to‘g‘risidagi xulosa elektron tarzda Tizim orqali olinadi;

v) moliya-xo‘jalik faoliyatini amalga oshirmayotgan korxonalarni tugatishda:

korxonani moliya-xo‘jalik faoliyatini amalga oshirmayotgan deb hisoblash uchun asos bo‘ladigan muddat to‘qqiz oyni tashkil etadi;

moliya-xo‘jalik faoliyatini amalga oshirmayotgan korxonalar davlat soliq xizmati organining taqdimnomasiga asosan ro‘yxatdan o‘tkazuvchi organ tomonidan Tadbirkorlik sub'yektlarining yagona davlat reyestrida uch yil muddatga harakatsiz rejimga o‘tkaziladi;

harakatsiz rejimiga o‘tkazilgan korxonalar faoliyati uch yil davomida tiklanmagan taqdirda, ro‘yxatdan o‘tkazuvchi organ ularni Tadbirkorlik sub'yektlarining yagona davlat reyestridan chiqaradi.

Belgilab qo‘yilishicha, Tizimga ulangan davlat organlari va boshqa tashkilotlar tomonidan tegishli axborotlarning o‘z vaqtida, to‘liq va ishonchli tarzda kiritilishini ta'minlamaslik davlat xizmatlari ko‘rsatilishining belgilangan tartibini buzish deb hisoblanadi.

O‘zbekiston Respublikasi Adliya vazirligi huzuridagi Davlat xizmatlari agentligi Tizimga ulangan davlat organlari va boshqa tashkilotlar tomonidan tegishli axborotlar o‘z vaqtida, to‘liq va ishonchli tarzda kiritilishi bo‘yicha, shu jumladan Tizim orqali doimiy nazorat o‘rnatadi.

O‘zbekiston Respublikasi Vazirlar Mahkamasi huzuridagi “O‘zarxiv” agentligi ikki hafta muddatda ixtiyoriy tugatilayotgan tadbirkorlik sub'yektlarining hujjatlarini qabul qilishda arxiv xizmatlarining amaldagi normativ bo‘yicha aniqlanadigan narxlarini ikki barobar kamaytirish bo‘yicha Vazirlar Mahkamasiga taklif kiritadi.