Shavkat Mirziyoyev elektrotexnika sanoati bo‘yicha qaror imzoladi. 1 iyuldan yangi tartib o‘rnatiladi

“Yo‘l xaritasi”da nazarda tutilgan tadbirlarning o‘z vaqtida, to‘liq va sifatli amalga oshirilishi yuzasidan tizimli monitoring o‘rnatish;

har o‘n besh kunda amalga oshirilayotgan loyihalarning holati va “Yo‘l xaritasi”ning bajarilishi yuzasidan Vazirlar Mahkamasiga axborot kiritib borish.

Shunday tartib o‘rnatiladiki, unga muvofiq 2019 yil 1 iyuldan boshlab:

a) elektrotexnika va elektromaishiy mahsulotlarning davlat xaridlari, shu jumladan davlat xaridlari strategik sub'yektlari tomonidan amalga oshirilishida mahalliy ishlab chiqaruvchilarga nisbatan 20 foizgacha narx preferensiyasi qo‘llaniladi;

b) Davlat budjeti mablag‘lari hisobidan obektlarni “tayyor holda topshirish” shartlari asosida qurish yoki rekonstruksiya qilish bo‘yicha tender hujjatlarida pudratchi tomonidan respublikada ishlab chiqarilishi yo‘lga qo‘yilgan elektrotexnika va elektromaishiy mahsulotlar sotib olish nazarda tutiladi;

v) elektrotexnika sanoati tarmog‘i korxonalari tomonidan:

o‘zlari ishlab chiqargan elektrotexnika va elektromaishiy mahsulotlarni eksport qilish operatsiyalari bo‘yicha muddati o‘tkazib yuborilgan debitor qarzdorlik hosil bo‘lishini hisoblashning yagona muddati bojxona yuk deklaratsiyasi rasmiylashtirilgan sanadan boshlab 180 kun etib;

o‘zlarining ishlab chiqarish ehtiyojlari uchun texnologik uskunalarni respublikaga olib kirish va “erkin muomalaga chiqarish (import)” bojxona rejimiga rasmiylashtirish yoki import kontraktlari bo‘yicha ular uchun to‘langan pul mablag‘larini qaytarish muddati import kontraktlari bo‘yicha to‘lov amalga oshirilgan kundan boshlab 270 kun etib belgilanadi;

g) kredit summasi va valuta turidan qat'iy nazar elektrotexnika sanoati tarmog‘i korxonalari tomonidan respublikada ishlab chiqarilmaydigan elektrotexnika va elektromaishiy mahsulotlar ishlab chiqarish bo‘yicha loyihalarni amalga oshirish uchun mahalliy tijorat banklaridan olinadigan kreditlarning ekvivalenti 1 mln AQSh dollaridan oshmagan qismi bo‘yicha foiz xarajatlari O‘zbekiston Respublikasi Vazirlar Mahkamasi huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi mablag‘lari hisobidan tijorat banklari tomonidan belgilangan foiz stavkasining 50 foizi miqdorida, lekin kredit stavkasining 5 foizlik punktidan oshmagan miqdorda ikki yil mobaynida qoplanadi.

O‘zbekiston Respublikasi Moliya vazirligi, Iqtisodiyot va sanoat vazirligi hamda “O‘zeltexsanoat” uyushmasining O‘zbekiston Respublikasi Prezidentining 2017 yil 13 fevraldagi PQ–2772-son qaroriga muvofiq tashkil etilgan “O‘zeltexsanoat” uyushmasining Elektrotexnika sanoatini rivojlantirish jamg‘armasining mablag‘larini shakllantirish manbalari etib quyidagilarni belgilash to‘g‘risidagi taklifi qo‘llab-quvvatlandi:

O‘zbekiston Respublikasi Davlat budjetidan ajratiladigan mablag‘lar;

xalqaro moliya institutlari va boshqa xorijiy donorlar grantlari, shuningdek qonun hujjatlarida taqiqlanmagan boshqa manbalar.

O‘zbekiston Respublikasi Moliya vazirligi Jamg‘arma hisob raqamiga 2019–2020 yillarda teng ulushlarda 20 mlrd so‘m miqdorida mablag‘ o‘tkazib berilishini ta'minlaydi.

Belgilanishicha, O‘zbekiston Respublikasi Davlat budjetidan Jamg‘armaga ajratiladigan mablag‘lar quyidagi maqsadlar uchun sarflanadi:

ilmiy-tadqiqot va tajriba-konstruktorlik ishlanmalarni moliyalashtirish uchun respublikadagi ilmiy-tadqiqot muassasalariga va elektrotexnika 
sanoati tarmog‘i korxonalariga grantlar ajratish;

elektrotexnika va elektromaishiy mahsulotlar ishlab chiqaruvchi mahalliy korxonalarda xalqaro standartlarni joriy etish, mahsulotlarni chet el bozorlari talablariga muvofiq sertifikatlashtirish tadbirlari bilan bog‘liq xarajatlarning 50 foizini, lekin bitta holat bo‘yicha ekvivalenti 20 ming AQSh dollaridan ko‘p bo‘lmagan miqdorda qoplash;

startap-loyihalarini moliyalashtirish, elektrotexnika sanoati tarmog‘ida ishlab chiqarish va xizmat ko‘rsatish korxonalarining ustav fondlarini (kapitallarini) shakllantirishda ishtirok etish, maxsus injiniring markazlari va tajriba-konstruktorlik byurolarini tashkil etish;

elektrotexnika va elektromaishiy mahsulotlar ishlab chiqarish bo‘yicha investitsiya loyihalarini amalga oshirish uchun salohiyatli investorlarni jalb qilish maqsadida bo‘sh turgan va foydalanilmayotgan bino-inshootlarni ta'mirlash va rekonstruksiya qilish hamda ulardagi tashqi muhandislik-kommunikatsiya tizimlarini yaxshilash;

elektrotexnika va elektromaishiy mahsulotlar ishlab chiqaruvchi mahalliy korxonalarga tender savdolarida ishtirok etish uchun qisqa muddatga moliyaviy kafilliklar berish;

elektrotexnika sanoati tarmog‘i korxonalarining xalqaro ko‘rgazmalar va yarmarkalarda ishtirok etishi bilan bog‘liq xarajatlarining 50 foizini, lekin bitta holat bo‘yicha ekvivalenti 10 ming AQSh dollaridan ko‘p bo‘lmagan miqdorda qoplash;

mahalliy elektrotexnika va elektromaishiy mahsulotlarni ilgari surish bo‘yicha respublikada va xorijiy davlatlarda ko‘rgazma va yarmarkalar tashkil etish, seminarlar o‘tkazish, taqdimot materiallari va ko‘rgazma stendlarini tayyorlash.

O‘zbekiston Respublikasi Vazirlar Mahkamasi bir oy muddatda elektrotexnika sanoatini jadal rivojlantirish dasturi ishlab chiqilishi 
va tasdiqlanishini ta'minlaydi. Unda 2019–2022 yillarda:

tarmoqda misni qayta ishlash hajmini 5 baravar oshirish;

elektrotexnika va elektromaishiy mahsulotlar ishlab chiqarish hajmini 2 baravar oshirish;

elektrotexnika va elektromaishiy mahsulotlar eksporti hajmini 4 baravar oshirish;

amalga oshirilayotgan va istiqbolli investitsiya loyihalari doirasida kamida 15 ta yangi turdagi mahsulotlar ishlab chiqarishni o‘zlashtirish nazarda tutiladi.

“O‘zeltexsanoat” uyushmasi tarkibiga kiruvchi korxonalar 2022 yil 1 yanvarga qadar muddatga belgilangan tartibda shakllantiriladigan ro‘yxatlar bo‘yicha o‘zlarining ishlab chiqarish ehtiyojlari uchun olib kelinadigan, O‘zbekiston Respublikasida ishlab chiqarilmaydigan xomashyo, materiallar, butlovchi qismlar va asbob-uskunalar bo‘yicha bojxona bojlari to‘lashdan ozod etildi.