Normativ-huquqiy hujjatlar loyihalari muhokamasi portalida O‘zbekiston Respublikasi Bosh vazirining Tadbirkorlar murojaatlarini ko‘rib chiqish qabulxonalari qoshida faol ishbilarmonlar orasidan obro‘-e'tiborga ega tadbirkorlardan iborat jamoatchilik kengashlarini tuzish, respublikada kichik biznes va xususiy tadbirkorlikni yanada rivojlantirish, tadbirkorlik sub'yektlari hamda chet ellik investorlarning yo‘liga to‘siq va g‘ov bo‘layotgan muammolarni bartaraf etish, shuningdek, tadbirkorlar murojaatlari bilan ishlash samaradorligini oshirish maqsadida hujjat loyihasi e'lon qilindi.
Iqtisodiyot va sanoat vazirligi, Savdo-sanoat palatasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining Qoraqalpog‘iston Respublikasi, viloyatlar va Toshkent shahridagi hamda har bir tuman va shaharlardagi O‘zbekiston Respublikasi Bosh vazirining Tadbirkorlar murojaatlarini ko‘rib chiqish qabulxonalari qoshida faol ishbilarmonlar orasidan obro‘-e'tiborga ega tadbirkorlardan iborat jamoatchilik kengashlarini tashkil etish to‘g‘risidagi taklifiga rozilik berilishi mumkin.
Quyidagilar Tadbirkorlar kengashining asosiy vazifalari etib belgilanadi:
tadbirkor hamda chet ellik investorlarning yo‘liga to‘siq va g‘ov bo‘layotgan muammolarni bartaraf etish bo‘yicha takliflarni ishlab chiqish va Tadbirkorlik va kichik biznesni rivojlantirish Agentligiga taqdim etish;
hududlarda mavjud imkoniyatlar va talablardan kelib chiqib, tadbirkorlik yo‘nalishlarini rivojlantirish, mavjud muammolarni bartaraf etish, sohaga aloqador bo‘lgan islohotlarni tadbirkorlarga yetkazish;
tadbirkorlarning huquqiy madaniyatini oshirish va iqtisodiy ko‘nikmalarini shakllantirish bo‘yicha Tadbirkorlik va kichik biznesni rivojlantirish Agentligi, jamoatchilik kengashlari va boshqa tegishli tashkilotlar bilan tizimli aloqalarni yo‘lga qo‘yish.
Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hamda tumanlar va shaharlar hokimlari:
Bosh vazirning qabulxonalari, Savdo-sanoat palatasining Tadbirkorlikka ko‘maklashish markazlari bilan birgalikda joylardagi tadbirkorlar ishtirokida yig‘ilishlar o‘tkazilishini hamda faol ishbilarmonlar va obro‘-e'tiborga ega tadbirkorlardan Tadbirkorlar kengashi a'zolari va raisini saylab olinishini;
mazkur yig‘ilishlar qarorlari bilan quyidagilarni nazarda tutuvchi Tadbirkorlar kengashi ish reglamenti tasdiqlashini ta'minlaydi.
