Vazirlar Mahkamasining “Qoraqalpog‘iston Respublikasi, viloyatlar, shahar va tumanlarda Xotin-qizlar jamoatchilik kengashlarini tashkil etish to‘g‘risida”gi qarori loyihasi e'lon qilindi.
Qoraqalpog‘iston Respublikasi, viloyatlar, shahar va tumanlarda Xotin-qizlar jamoatchilik kengashlari tashkil etiladi.
Prezidentning “Jamiyatda ijtimoiy-ma'naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida”gi farmoni bilan O‘zbekiston Respublikasi Mahalla va oilani qo‘llab-quvvatlash vazirligi hududiy bo‘linmalari boshliqlarining birinchi o‘rinbosarlari Xotin-qizlar jamoatchilik kengashlari raislari etib belgilangan.
Xotin-qizlar jamoatchilik kengashlari to‘g‘risidagi namunaviy nizom tasdiqlanadi.
Belgilab qo‘yilishicha:
Xotin-qizlar jamoatchilik kengashlari o‘z ishini jamoatchilik asosida olib boradigan, doimiy faoliyat yurituvchi maslahat-kengash organi hisoblanadi;
Xotin-qizlar jamoatchilik kengashlari zimmasiga yuklatilgan vazifalar bilan bog‘liq masalalar bo‘yicha davlat organlari, xo‘jalik birlashmalari va jamoat tashkilotlaridagi xotin-qizlar masalalari bo‘yicha boshlang‘ich tashkilotlarning faoliyatini muvofiqlashtiradi;
Xotin-qizlar jamoatchilik kengashlari o‘z faoliyatini Namunaviy nizomga muvofiq ishlab chiqilgan va tegishlicha O‘zbekiston Respublikasi Mahalla va oilani qo‘llab-quvvatlash vazirligi hududiy bo‘linmalari boshliqlarining qarorlari bilan tasdiqlanadigan nizom asosida amalga oshiradi;
Xotin-qizlar jamoatchilik kengashlari a'zoligiga, qoida tariqasida, davlat organlari va jamoat tashkilotlarida, mahallalarda namunali xizmat ko‘rsatayotgan xotin-qizlar, jamoatchilik faoliyati sohalarida katta amaliy tajribaga ega obroʻ-eʼtiborli va tashabbuskor ayollar, nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari vakillari, namunali fuqarolar yig‘inlari raislarining oila, xotin-qizlar va ijtimoiy-ma'naviy masalalar bo‘yicha o‘rinbosarlari hamda oila va xotin-qizlar masalalari bo‘yicha mutaxassislari qabul qilinadi;
Xotin-qizlar jamoatchilik kengashlari zimmasiga yuklatilgan vazifalarni amalga oshirishda oilalarni mustahkamlashga, shuningdek yordamga muhtoj va og‘ir ijtimoiy ahvolga tushib qolgan, boquvchisini yo‘qotgan, nogironligi bo‘lgan xotin-qizlarni qo‘llab-quvvatlashga hamda ijtimoiy faolliklarini oshirish masalalariga ustuvor ahamiyat qaratadi;
