Millatlararo totuvlikni ta'minlash bo‘yicha jamoatchilik kengashlari tashkil etiladi

Vazirlar Mahkamasining “Millatlararo totuvlik, bag‘rikenglik va hamjihatlikni ta'minlash bo‘yicha Jamoatchilik kengashlari faoliyatini tashkil etish to‘g‘risida”gi qarori loyihasi e'lon qilindi.

Jamoatchilik kengashlari o‘z faoliyatini mustaqil amalga oshiruvchi maslahat organi hisoblanadi. Jamoatchilik kengashlari Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzurida tuziladi hamda uning faoliyati belgilangan hududga nisbatan tatbiq etiladi.

Jamoatchilik kengashlarining asosiy vazifalari quyidagilar hisoblanadi:

turli millat vakillari yashayotgan mintaqalar aholisining maishiy va ijtimoiy-iqtisodiy muammolarini har chorakda muhokama qilish va ularni hamkorlikda hal etishni tashkil qilish hamda monitoringini olib borish;

jamiyatda yuzaga kelishi mumkin bo‘lgan millatlararo ixtiloflar va mojarolarning barvaqt oldini olish va profilaktika qilish chora-tadbirlarini amalga oshirishga ko‘maklashish;

millatlararo munosabatlar sohasida davlat organlari bilan fuqarolik jamiyati institutlari o‘rtasidagi o‘zaro hamkorlik va ijtimoiy sheriklik mexanizmlarini takomillashtirish bo‘yicha takliflar berish;

millatlararo munosabatlar sohasida davlat siyosati amalga oshirilishi uchun mas'ul bo‘lgan davlat organlari faoliyati ustidan jamoatchilik nazoratini kuchaytirish;

millatlararo totuvlik, bag‘rikenglik va hamjihatlikni ta'minlash masalalari bo‘yicha Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarini nodavlat notijorat tashkilotlari va fuqarolik jamiyatining boshqa institutlari bilan samarali hamkorligini tashkil etish uchun fuqarolar bilan bog‘lab turadigan “ko‘prik” rolini bajarish;

turli millat va elatga mansub fuqarolarning huquqlari, erkinliklari va qonuniy manfaatlariga daxl qiluvchi eng muhim masalalar yuzasidan davlat organlarining faoliyati haqidagi jamoatchilik fikrini tizimli monitoring qilishda va har tomonlama tahlil qilishda, sotsiologik so‘rovlar o‘tkazishda, jumladan ularni axborot-kommunikatsiya texnologiyalaridan foydalangan holda o‘tkazishda ishtirok etish;

etnomadaniy infratuzilmani, jumladan milliy madaniy markazlarning, shuningdek faoliyati millatlararo munosabatlar sohasida davlat siyosatini amalga oshirish doirasidagi vazifalarni hal etishga yo‘naltirilgan davlat muassasalarining etnomadaniy infratuzilmasini rivojlantirishga ko‘maklashish;

O‘zbekistondagi millat va elatlarning o‘ziga xos xususiyatlarini saqlab qolish maqsadida O‘zbekistonning turistik mahsulotlarni ommalashtirish, shu jumladan joylarda etnoturizmni rivojlantirish ishlarida hamkorlik qilish;

fuqarolarning ona tilida ta'lim olish imkoniyatini ta'minlash darajasini oshirish bo‘yicha takliflar berish;

millatlararo totuvlik, bag‘rikenglik va hamjihatlikni ta'minlashga doir qabul qilinayotgan normativ-huquqiy hujjatlarda, qarorlarda, shuningdek davlat, tarmoq va hududiy rivojlantirish dasturlarida jamoatchilik fikri hisobga olinishini nazorat qilish;

millatlararo totuvlik, bag‘rikenglik va hamjihatlikni ta'minlash borasidagi ishlar samaradorligini oshirish yuzasidan belgilangan hududda sog‘lom ma'naviy-ruhiy holatni, qonuniylik, yuqori huquqiy madaniyat va axloqiylikni ta'minlash borasida taklif va tavsiyalar ishlab chiqish;

millatlararo munosabatlar sohasida olib borilayotgan davlat siyosatining mazmun-mohiyati va ahamiyatini keng ko‘lamda tushuntirish maqsadida davlat organlari rahbarlarining, fuqarolik jamiyati institutlari mutaxassislari, ekspertlari hamda vakillarining ommaviy axborot vositalaridagi chiqishlarini, uchrashuvlar, taqdimotlar, davra suhbatlari hamda boshqa tadbirlarni tashkil etish;

 millatlararo munosabatlar sohasida O‘zbekiston Respublikasi davlat siyosati konsepsiyasining ijrosini ta'minlash yuzasidan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari faoliyatining ochiqligini ta'minlash bo‘yicha amalga oshirilayotgan chora-tadbirlar monitoringini olib borish.

 Jamoatchilik kengashi o‘zining asosiy vazifalariga muvofiq quyidagi funksiyalarni amalga oshiradi:

fuqarolar, nodavlat notijorat tashkilotlari va fuqarolik jamiyati boshqa institutlarining millatlararo totuvlik, bag‘rikenglik va hamjihatlikni ta'minlashga oid tashabbus va murojaatlarini ko‘rib chiqishda ishtirok etadi, ularni ko‘rib chiqish natijalari bo‘yicha Vazirlar Mahkamasiga tegishli takliflar tayyorlaydi;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan fuqarolar, nodavlat notijorat tashkilotlari va fuqarolik jamiyati boshqa institutlarining millatlararo totuvlik, bag‘rikenglik va hamjihatlikni ta'minlashning samarali shakl va usullarda o‘zaro hamkorligi tahlilini amalga oshiradi, shuningdek ularni takomillashtirish bo‘yicha takliflarni ishlab chiqadi;

millatlararo totuvlik, bag‘rikenglik va hamjihatlikni ta'minlashga doir normativ-huquqiy hujjatlarni, shuningdek davlat organlarining ichki idoraviy hujjatlarni takomillashtirish, ulardagi mavjud kamchiliklarni bartaraf etish bo‘yicha takliflarni ishlab chiqadi hamda ushbu takliflarni Jamoatchilik kengashi a'zolari o‘rtasida muhokama qilish bo‘yicha tadbirlarni tashkil qilishda ishtirok etadi;

jamiyatda millatlararo totuvlik va bag‘rikenglikni ta'minlash, do‘stlik muhitini va ko‘p millatli katta yagona oila tuyg‘usini mustahkamlash, yoshlarni Vatanga sadoqat va qonunlarga hurmat ruhini kuchaytirish, ularni ijtimoiy, siyosiy, psixologik va ma'naviy-ma'rifiy jihatdan yuksaltirish bo‘yicha takliflar tayyorlaydi, ushbu sohada ma'naviy-ma'rifiy va madaniy tadbirlarni tashkil etishda ishtirok etadi, shuningdek, bu boradagi ilmiy-ma'rifiy va o‘quv adabiyotlarini takomillashtirish bo‘yicha takliflar ishlab chiqadi;

millatlararo totuvlik, bag‘rikenglik va hamjihatlikni ta'minlash bo‘yicha belgilangan hududda amalga oshirilayotgan tizimli chora-tadbirlar haqida muntazam ravishda ma'lumot beradi hamda mavjud muammolarni hal qilish, kamchiliklarni bartaraf qilish haqida takliflar ishlab chiqadi;

millatlararo totuvlik, bag‘rikenglik va hamjihatlikni ta'minlash borasida ishlar samaradorligini oshirishga bag‘ishlangan ilmiy-nazariy va ilmiy-amaliy anjumanlar, seminarlar, davra suhbatlarini tashkil qilishda ishtirok etadi;

 jamoatchilik kengashi faoliyatini rasmiy veb-saytlarda hamda ommaviy axborot vositalarida yoritish bo‘yicha amalga oshirilayotgan ishlar natijalarini tahlil qiladi, ularning samaradorligini oshirish va mavjud kamchiliklarni bartaraf etish bo‘yicha takliflar tayyorlaydi;

o‘z vazifalarini amalga oshirishda nodavlat notijorat tashkilotlari, ommaviy axborot vositalari, shuningdek, fuqarolik jamiyatining boshqa institutlari hamda fuqarolar bilan hamkorlik qiladi.

 Jamoatchilik kengashi o‘zining asosiy vazifalari va funksiyalarini bajarish uchun quyidagi huquqlarga ega:

o‘z vakolatlari doirasida davlat organlaridan kerakli hujjatlarni, statistik va tahliliy ma'lumotlarni so‘rab olish va qabul qilish;

Jamoatchilik kengashi vakolatiga tegishli masalalarni hal qilish uchun Jamoatchilik kengashi a'zolaridan iborat jamoatchilik komissiyalarini tashkil etish;

Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari bilan kelishgan holda millatlararo totuvlik, bag‘rikenglik va hamjihatlikni ta'minlashga bag‘ishlab o‘tkaziladigan yig‘ilishlar va boshqa tadbirlarda ishtirok etish;

turli millat vakillari hamda ular oila a'zolarining konstitutsiyaviy huquqlari, erkinliklari va qonuniy manfaatlariga rioya etilishini tahliliy o‘rganish;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga Jamoatchilik kengashi vakolatiga tegishli masalalar bo‘yicha takliflar kiritish;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda Jamoatchilik kengashi tomonidan tashkil etiladigan tadbirlarga davlat, jamoat, madaniyat va san'at arboblari, olimlar, mutaxassislar, nodavlat notijorat tashkilotlari, ommaviy axborot vositalari va fuqarolik jamiyatining boshqa institutlarini jalb qilish, shuningdek ular bilan hamkorlikda tadbirlar tashkil qilish;

Jamoatchilik kengashining faoliyati haqida ommaviy axborot vositalarida e'lon qilish.

Jamoatchilik kengashi qonun hujjatlariga muvofiq boshqa huquqlarga ham ega bo‘lishi mumkin.

Jamoatchilik kengashlari o‘z faoliyatini amalga oshirishda quyidagi majburiyatlarga ega:

O‘zbekiston Respublikasi Konstitutsiyasi va Qonunlariga, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining Farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, vazirliklar va idoralar tomonidan qabul qilingan normativ-huquqiy hujjatlarga, mazkur Nizomga va boshqa Qonun hujjatlariga rioya qilishi;

davlat organi va uning mansabdor shaxslarining o‘z vakolatlari doirasida amalga oshiradigan faoliyatiga aralashmasligi;

davlat organi va uning mansabdor shaxslari faoliyat ko‘rsatishi uchun to‘sqinlik qilmasligi;

fuqarolarning or-nomusi va qadr-qimmatini tahqirlashga, ularning shaxsiy hayotiga aralashishga yo‘l qo‘ymasligi;

jamoatchilik nazoratini amalga oshirish davomida olingan axborotning, agar bunday axborotni tarqatish qonun bilan cheklangan bo‘lsa, maxfiyligiga rioya qilishi shart.

Jamoatchilik kengashining zimmasida qonun hujjatlariga muvofiq boshqa majburiyatlar ham bo‘lishi mumkin.