Aziz Abduhakimov endi faqat ta'lim-tarbiya, turizm va sport masalalari bilan shug‘ullanadi

Bosh vazir o‘rinbosari Aziz Abduhakimov bundan keyin faqat ta'lim-tarbiya, turizm va sport masalalari bilan shug‘ullanadi. Bu haqda prezident Shavkat Mirziyoyev 23 avgust kuni xalq ta'limi tizimini rivojlantirish, pedagoglarning malakasi va jamiyatdagi nufuzini oshirish, yosh avlod ma'naviyatini yuksaltirish masalalariga bag‘ishlangan videoselektor yig‘ilishida ma'lum qildi.

«A.Aripovga ta'lim tizimi samaradorligi va ish unumdorligini oshirish uchun A.Abduhakimovdan sog‘liqni saqlash, farmatsevtika va boshqa yo‘nalishlarga rahbarlik qilishni chiqarish kerak. U bundan keyin faqat ta'lim-tarbiya, turizm va sport masalalari bilan puxta shug‘ullanishi lozim», - deya davlat rahbarining so‘zlarini keltirmoqda Kun.uz muxbiri.

Ma'lumot uchun, bosh vazirning ijtimoiy masalalar bo‘yicha o‘rinbosari Aziz Abduhakimov 1974 yilda tug‘ilgan. 2014 yil yozidan Bandlik va mehnat munosabatlari vazirligini boshqargan. Avvalroq Xususiylashtirish, monopoliyadan chiqarish va raqobatni rivojlantirish davlat qo‘mitasi raisi lavozimida faoliyat olib borgan. 2017 yilning avgust oyida Turizmni rivojlantirish davlat qo‘mitasi raisi lavozimini egallagan, 2018 yil may oyida bosh vazir o‘rinbosari etib tayinlangan.