«Mening bir yillik umrim o‘yinchoq emas» - «Narxoz» Samarqand filialida abituriyentlarning harbiy imtiyozi hisobga olinmadi

Tahririyatimizga muddatli harbiy xizmatni o‘tab qaytgan, Toshkent davlat iqtisodiyot universiteti Samarqand filialiga hujjat topshirgan bir necha abituriyent murojaat qildi.

Ularning aytishicha, oliy o‘quv yurtlariga imtihon natijalari e'lon qilingach, bu oliygohda harbiy imtiyozlar hisobga olinmagan ekan. Shu tarzda 30 nafar abituriyentning kelgusi taqdiri hali ham noma'lum bo‘lib qolmoqda.

«Hali biror-bir institutda harbiy imtiyoz hisobga olinmaydi degan e'lon chiqarilgan emas. Agar shunday bo‘lganida biz hech qachon «Narxoz»ga hujjat topshirmagan bo‘lardik. Modomiki, harbiy imtiyozlar bu oliygohda hisobga olinmas ekan bizni ogohlantirishlari shart edi. Axir, bizning bir yillik umrimiz o‘yinchoq emas-ku», demoqda abituriyentlar.

Toshkent davlat iqtisodiyot universiteti Samarqand filiali rahbari O.Murtazoyevdan bu holat yuzasidan izoh so‘radik.

 «Qabul kvotalarini Davlat qabul komissiyasi belgilaydi. Belgilash vaqtida barcha oliy ta'lim muassasalaridagi imtiyozlar qo‘shiladi. Yangi ochilgan filiallarga bu narsa qo‘shilmay qolgan. Davlat qabul komissiyasining bu bo‘yicha qarori davlat test markaziga, test markazi tomonidan esa oliy ta'lim muassasalariga yuboriladi. Barcha oliygohlarning yangi tashkil etilgan filiallariga bu narsa kiritilmagan», deydi filial rahbari.

Tabiiyki, filiallarga harbiy imtiyozlar uchun kvotalar kiritilmay qolganidan, aniqrog‘i muayyan tashkilotlar xatosidan abituriyentlarning xabari yo‘q. Chunki bu borada hech qanday e'lon berilmagan. O‘zlari aytganidek, yoshlarning bir yillik umri bitta xato evaziga bemaqsad o‘tadigan bo‘lib turibdi.

Filial rahbariyatining ma'lum qilishicha, ayni vaqtda Toshkent davlat iqtisodiyot universiteti tomonidan ana shu masala yuzasidan yuqori turuvchi idoralarga xat yuborilgan.

Darvoqe, Vazirlar Mahkamasining 2019 yil 17 avgustda e'lon qilingan «O‘zbekiston Respublikasi Qurolli kuchlari safida muddatli harbiy xizmatni o‘tab, harbiy qism qo‘mondonligi tavsiyanomalariga ega bo‘lgan fuqarolarni oliy ta'lim muassasalariga qabul qilish tartibi to‘g‘risidagi nizomni tasdiqlash haqida»gi qarori e'lon qilingan. Hujjatning 1-ilovasida ushbu nizom faqatgina xorijiy oliy ta'lim muassasalari va ularning filiallari hamda nodavlat oliy ta'lim muassasalariga tatbiq etilmasligi aniq qilib belgilab qo‘yilgan.

Demak, fikrimizcha, abituriyentlar boshqa oliy ta'lim muassasalari va ularning filiallarida davlat tomonidan berilgan imtiyozlardan foydalanishga, aniqroq aytganda hali masala yechim topishidan umid qilishga haqli.

Xo‘sh, xatoni tuzatish mumkinmi? Ana shu savolga ayni kunlarda o‘nlab yoshlar xavotir va intiqlik bilan javob kutishmoqda.