Ukraina tashqi ishlar vaziri Zelenskiyning Donbass bo‘yicha rejalarini ma'lum qildi

Ukraina tashqi ishlar vaziri Vadim Pristayko prezident Vladimir Zelenskiyning Donbassda tinchlik o‘rnatish bo‘yicha rejalarini ma'lum qildi. U bu haqda Die Welt nashriga bergan intervyusida aytdi.

«Ukraina prezidenti Vladimir Zelenskiy kelgusi olti oy ichida haqiqiy siljishga erishishni istaydi», — dedi u.

Shu bilan birga u vaziyatni barqarorlashtirish Ukraina hududlarini berish evaziga amalga oshirilmasligini ta'kidladi. 

«Biz Ukraina hududlarini bermaymiz va rossiyaliklarga qizil chiziqlarimiz haqida ma'lum qilganmiz», — dedi u.

Pristaykoning qayd etishicha, Ukrainaning asosiy maqsadi o‘z fuqarolarini qaytarish va bunga erishish uchun nodiplomatik vositalarga qo‘l urishga ham tayyor.