Abdulaziz Komilov amerikalik kongressmen Trent Kelli va olim Frederik Starrga «Do‘stlik» ordenini topshirdi

O‘zbekistonning mintaqada barqarorlik va xavfsizlikni ta'minlashdagi sa'y-harakatlari uchun minnatdorchilik bildirildi. «Afg‘onistondagi mojaroni tinch yo‘l bilan hal qilish – mamlakatimizning o‘ta muhim maqsadi, – dedi administratsiya vakili va O‘zbekiston va AQSh sherikchiligi «urush tilka-pora qilgan ushbu mamlakatda tinchlik va barqarorlikka erishishning muhim tarkibiy qismi» ekanligini ta'kidladi. U prezident Donald Trampning prezident Shavkat Mirziyoyevga «Afg‘onistondagi mojaroni tinch hal qilish yo‘llarini topish borasidagi AQSh sa'y-harakatlarini qo‘llab-quvvatlagani uchun» shaxsan minnatdorchilik bildirganini e'tirof etdi.

Xavfsizlik kengashi vakili Missisipi gubernatori Fil Brayant boshchiligidagi delegatsiyaning respublikaga tashrifi ikki mamlakat o‘rtasidagi aloqalarni yangi darajaga ko‘tarish imkonini berganini qayd etdi. O‘z navbatida, AQSh savdo vaziri Uilbor Rossning O‘zbekistonga safari savdo va biznes hamkorlik salohiyati bilan bevosita tanishish uchun qulay imkoniyat taqdim etdi.

U o‘z so‘zi yakunida iqtisodiyot, kontrterrorizm, mintaqaviy xavfsizlik sohalarida yoki inson huquqlarini yaxshilash yo‘nalishida ham AQSh ikki mamlakat o‘rtasidagi strategik sherikchilikni keyingi kunlar va yillarda davom ettirish va chuqurlashtirishni sabrsizlik bilan kutayotganligini aytdi.

Tadbir doirasida AQShning ikki taniqli ijtimoiy-siyosiy va ilmiy arboblariga «Do‘stlik» ordenlarini taqdim etish marosimi bo‘lib o‘tdi.

Tashqi ishlar vaziri Abdulaziz Komilov O‘zbekiston prezidenti topshirig‘iga binoan yuksak davlat mukofotini ikki tomonlama munosabatlarni mustahkamlash ishida, O‘zbekiston bo‘yicha Kokus – AQSh Kongressidagi do‘stlik guruhini tashkil etish hamda parlamentlararo muloqotni sezilarli darajada kengaytirishdagi xizmatlari va sadoqati uchun kongressmen Trent Kelliga topshirdi.

«Do‘stlik» ordeni Markaziy Osiyo va Kavkaz instituti direktori Frederik Starrga ham topshirildi. U uzoq yillardan beri mamlakatning ko‘p asrlik tarixiga, o‘zbek xalqining madaniyati, an'ana va odatlariga oid ilmiy tadqiqotlar olib borib, AQSh va dunyoning boshqa burchaklaridagi ko‘plab odamlarni O‘zbekistonning zamonaviy qiyofasi, respublikadagi ichki o‘zgarishlarning mohiyati va mazmuni, tashqi siyosatining ustuvor vazifalari haqida xabardor qilmoqda.

Kongressmen Trent Kelli yuksak mukofot uchun O‘zbekiston rahbariyatiga samimiy minnatdorchilik izhor etdi. U «mazkur mukofot katta mas'uliyat yuklashini va AQSh-O‘zbekiston munosabatlarini rivojlantirish ishida yangi tashabbuslar va konstruktiv harakatlarga rag‘batlantiradi», dedi. Amerikalik kongressmen ikki tomonlama munosabatlarning yuqori dinamikasidan o‘ta mamnunligini izhor etdi. Prezident Shavkat Mirziyoyevning 2018 yil may oyidagi AQShga rasmiy tashrifidan buyon «O‘zbekiston-AQSh munosabatlari yanada yaxshilanmoqda, ko‘p qirrali hamkorlikni ilgari surishga o‘zaro qiziqish ortmoqda». O‘zbekistonning strategik joylashuvi, inson omili va tsivilizatsion salohiyati hamda mintaqada nufuzi oshganini hisobga olgan holda mamlakat AQSh uchun o‘ta muhim ahamiyat kasb etishi ta'kidlandi.

Kongressmen ta'kidladiki, O‘zbekiston va AQSh mintaqada izchil iqtisodiy o‘sishga erishish va barqarorlikni ta'minlashda umumiy maqsadlar va ustuvor yo‘nalishlarga ega. Uning so‘zlarga ko‘ra, bu ikki mamlakat o‘rtasidagi har taraflama hamkorlikni yanada mustahkamlashning muhim sharti hisoblanadi.

Trent Kelli AQSh Kongressida «O‘zbekiston bo‘yicha Kokus» hamraisi, Texas shtatidan kongressmen Visente Gonsales bilan O‘zbekiston va AQSh o‘rtasidagi strategik sherikchilikni yanada rivojlantirishni qo‘llab-quvvatlashga yo‘naltirilgan AQSh Kongressining maxsus Qarori qabul qilinishi bo‘yicha tashabbus bildirilganini ma'lum qildi.

O‘z navbatida, Fredrik Starr «Do‘stlik» ordeni bilan taqdirlangani munosabati bilan prezident Shavkat Mirziyoyevga chuqur minnatdorlik bildirdi. Mazkur taqdirlanish u uchun katta mukofot hamda respublika rahbari va o‘zbek xalqining yuksak ishonchi belgisi hisoblanishini ma'lum qildi.

Fredrik Starr qayd etganidek, «O‘zbekiston tasavvur qilib bo‘lmaydigan o‘zgarishlarni boshdan kechirmoqda. Ushbu o‘zgarishlar uzoqni ko‘zlagan va ko‘p qirrali sifatga ega bo‘lib mamlakatning ijtimoiy-siyosiy, iqtisodiy va ijtimoiy hayotining barcha jabhalarini qamrab oladi». Uning fikricha, bu kabi keng miqyosli islohotlar va mamlakat rahbariyatining intilishlari dunyoda kam uchragan. «Biz bu jarayonlarni nafaqat kuzatishimiz, balki yanada faolroq qo‘llab-quvvatlashimiz kerak», dedi AQShning yetakchi tahliliy markazi rahbari.

Tadbirda Kolumbiya okrugining davlat kotibi Kimberli Bassett so‘zga chiqdi va Vashington shahri meri Myurel Bouserning tabrigini o‘qib berdi:

«Vashington shahri meri sifatida O‘zbekiston Respublikasi Mustaqilligining 28 yilligi munosabati bilan qabul ishtirokchilari va O‘zbekiston xalqini tabriklashdan bag‘oyat mamnunman.

O‘tgan yili Vashington O‘zbekiston prezidenti Shavkat Mirziyoyevni kutib oldi. U mamlakatlarimiz o‘rtasidagi strategik sherikchilik munosabatlarini mustahkamlashda muhim rol o‘ynadi, qariyb 5 milliard AQSh dollariga teng shartnomalar imzolanishiga, ikki tomonlama tashqi savdo aylanmasini 2 barobar oshishiga hamda O‘zbekistonga tashrif buyurgan amerikalik sayyohlar oqimining 60 %ga oshishiga olib keldi».

Tadbir doirasida «Boeing» kompaniyasining xalqaro operatsiyalar bo‘yicha direktori va Amerika-O‘zbekiston savdo palatasining moliyaviy direktori Brayn Lopp, «Honeywell» kompaniyasining Turkiya va Markaziy Osiyo mamlakatlari bo‘yicha prezidenti Frans van Dyursen va Kanadaning qazilma xom-ashyolarga ixtisoslashgan «B2gold» kompaniyasi vitse-prezidenti Nil Rider nutq so‘zladi.

Ular O‘zbekistonda davlat rahbari boshchiligida olib borilayotgan mamlakatni barqaror rivojlantirishga, iqtisodiyotni liberallashtirishga, monopoliyani qisqartirishga, ishbilarmonlik muhitini yaxshilashga, investorlar va biznes tashabbuslarini qo‘llab-quvvatlashga yo‘naltirilgan islohotlarga yuqori baho berdilar hamda bular investorlarga «davlat nomidan ishonchli sherik topish» imkoniyatini berish orqali davlat va AQSh kompaniyalari o‘rtasida ishonchli va o‘zaro manfaatli munosabatlar o‘rnatishda muhim ahamiyat kasb etishini qayd etdilar, deyiladi TIV xabarida.