Washington Post nashrining xabar berishicha, IShID yetakchisi Abu Bakr al-Bag‘dodiyning qayerda yashirinayotganini uning yaqin atrofidagi ayg‘oqchi yordamida aniqlashga muvaffaq bo‘lindi. Gap al-Bag‘dodiyning Suriya bo‘ylab harakatlanishini muvofiqlashtirgan va uning Idlibdagi boshpanasini tayyorlashda yordam bergan odam haqida ketmoqda.
Ma'lum qilinishicha, ushbu odam AQSh razvedkasiga nafaqat terrorchi qayerda yashirinayotgani, balki u yashiringan uydagi xonalar rejasini ham taqdim qilgan. Bu ma'lumot binoning shturm qilinishi vaqtida muhim ahamiyat kasb etgan.
Ayg‘oqchi al-Bag‘dodiyga shunchalik yaqin bo‘lganki, u maxsus amaliyot vaqtida u bilan birga ushbu uyda bo‘lgan. IShID yetakchisi o‘ldirilgandan 2 kun o‘tib ayg‘oqchi oilasi bilan birga mamlakatdan olib chiqilgan.
Taxmin qilinishicha, ushbu shaxs al-Bag‘dodiy uchun va'da qilingan 25 mln dollarlik mukofot pulini olishga umid qilsa bo‘ladi. Biroq taxminlarga ko‘ra, u nafaqat pul uchun harakat qilgan. WP manbalaridan birining ta'kidlashicha, gap qarindoshlaridan birining o‘limi uchun IShIDdan o‘ch olmoqchi bo‘lgan arab haqida bormoqda. Dastlab u “Suriya demokratik kuchlari”dagi kurdlar bilan aloqaga chiqqan. Ular esa ushbu arab haqida amerikaliklarga xabar qilishgan. Amerikaliklar ayg‘oqchi qanchalik rost so‘zlayotganini uzoq vaqt tekshirishgan va oxir-oqibat kerakli odamni topishganiga amin bo‘lishgan. Bu bir necha hafta avval yuz bergan va shundan keyin maxsus amaliyotga tayyorgarlik ko‘rila boshlangan.
