Al-Bag‘dodiyning jasadi dengizga cho‘ktirib yuborildi - OAV

Jasad Iroqning Anbar viloyatidagi Ayn al-Asad harbiy bazasiga keltirilib, u yerdan noma'lum yo‘nalishda olib ketilgan.

Biroq CNN telekanalining ikkita harbiy manbaga tayanib xabar berishicha, jasad dengizga olib borilib, suvga cho‘ktirib yuborilgan. “Al-Qoida”ning 2011 yilda yo‘q qilingan yetakchisi Usoma bin Lodin jasadi bilan ham xuddi shunday yo‘l tutilgan edi. Uning jasadi ham dengizga olib chiqilib, cho‘ktirib yuborilgan.

Rasmiy ma'lumotlariga ko‘ra, bin Lodinning jasadi AQShning Carl Vinson harbiy kemasida Arabiston dengiziga yetkazilib, kafanlanib, suvga cho‘ktirib yuborilgan.

AQSh al-Bag‘dodiyning qabri radikal terrorchilar tomonidan sig‘inish joyiga aylanmasligi uchun uni cho‘ktirishga qaror qildi. Ta'kidlanishicha, al-Bag‘dodiyning yo‘q qilinishi va dafn etilishi foto va videomateriallari maxfiylashtirilgan. 

Telekanalning ma'lum qilishicha, 27 oktyabrda AQSh prezidentining xavfsizlik bo‘yicha maslahatchisi Robert O'Brayyen NBC telekanaliga intervyusida al-Bag‘dodiyning jasadi bilan bin Lodinniki kabi yo‘l tutilishini aytgan.