Rustam Ashurmatov Key-Liga Chellenjda chempionlikni qo‘lga kiritdi

O‘zbekiston terma jamoasi himoyachisi to‘p suradigan «Kvangju» klubi 35-turgacha 21 g‘alaba, 10 durang va 4 mag‘lubiyat bilan 73 ochko jamlab, peshqadamlik qilayotgandi. Bugun «Chonnam Dragons»ga qarshi maydonga tushgan kvangjuliklar o‘z maydonlarida kutilmaganda mag‘lubiyatga uchrashdi (1:2).

Shunga qaramay, parallel o‘yinlardagi natijalarga ko‘ra ushbu jamoa Key-ligadan keyingi o‘rinda turuvchi «Key-liga Chellenj»da g‘oliblikni qo‘lga kiritishi aniq bo‘ldi va yangi mavsumdan asosiy musobaqada ishtirok etadigan bo‘ldi.

Eslatib o‘tamiz, Janubiy Koreya quyi ligasida Rustam Ashurmatovdan tashqari Javlon Ibrohimov ham to‘p suradi. Uning klubi «Suvon» ayni damda 10 jamoa orasida 8-pog‘onadan joy olgan.