Kun.uz nashri Telegram`da o‘tkazilgan so‘rovnomaga asosan, O‘zbekistonning 2019 yildagi eng yaxshi elektron ommaviy axborot vositasi deb topildi.
So‘rovnomani Sof.uz sayti o‘tkazdi va unda 3202 kishi qatnashdi. Kun.uz nomzodini respondentlarning 42 foizi (1355 kishi) qo‘llab-quvvatladi.
«Darhaqiqat, aynan Kun.uz nashrining tashkil etilishi, milliy axborot maydonida turli xabar saytlarining yuzaga kelishiga ilhom bergan. Saytga bir kunda 400 000 foydalanuvchi tashrif buyuradi», – deyiladi tashkilotchi nashr izohida.
Ikkinchi o‘rinni 17 foiz (552ta) ovoz bilan Sof.uz band etgan bo‘lsa, yuqori uchlikni 14 foiz (442ta) ulush bilan Azon.uz yakunlab berdi. Boshqa bir ommabop yangiliklar nashri – Daryo.uz 9 foiz (279ta) ovoz to‘plab, 4-o‘rinda qayd etildi.
Xushnudbek Xudoyberdiyev – eng yaxshi bloger
Sof.uz sayti, shuningdek, 2019 yilning eng yaxshi blogeri va eng yaxshi Telegram-kanalini aniqlash bo‘yicha ham so‘rovnoma o‘tkazdi.
Unga asosan, huquqshunos Xushnudbek Xudoyberdiyev yaqqol ustunlik bilan O‘zbekistonning eng yaxshi blogeri deb e'tirof etildi.
Nurbek Alimov taxallusiga ega bloger ikkinchi, Azon.uz sayti ta'sischisi Mubashshir Ahmad uchinchi pog‘onani egalladi.
«Zikr ahlidan so‘rang» – eng yaxshi Telegram-kanal
Islom.uz saytidagi «Zikr ahlidan so‘rang» loyihasining Telegram`dagi kanali Sof.uz`ning mazkur yo‘nalishdagi so‘rovnomasida g‘olib chiqdi.
Savollar_kanal manzilidagi kanalning 65 mingdan ortiq obunachisi bor. 16 mingga yaqin ishtirokchi qatnashgan so‘rovnomada islomiy sahifa 30 foiz ovoz yig‘di.
Huquqshunos va bloger Xushnudbek Xudoyberdiyevning 166 mingdan ortiq o‘quvchiga ega Xushnudbek.uz kanali esa 22 foiz ulush bilan ikkinchi o‘rinni band etdi.
Uchinchi pog‘onada 16,7 ming kishi kuzatadigan «Fayzbog‘» kanali qayd etilgan. Ushbu nominantga respondentlarning 12 foizi ovoz bergan.
