Davlat ulushi mavjud barcha korxonalar xususiylashtiriladi

Davlat aktivlarini boshqarish agentligi direktori Sunatulla Bekenov Birlashgan millatlar tashkilotining xalqaro eksperti Jyeyko Savichni qabul qildi.

 Uchrashuvda dastlab, agentlik faoliyati, asosiy funksiya va vazifalari hamda yaqin kelajakdagi rejalari to‘g‘risida batafsil ma'lumot berildi.

 Qayd etilganidek, davlat budjetiga umumiy tushumning asosiy qismini korxonalar va aktivlar hisobidan tushadigan dividendlar (taxminan 70 foizi), xususiylashtirish va davlat mulkini ijaraga berishdan tushgan tushumlar tashkil qiladi.

 “Strategik ahamiyatga ega bo‘lgan korxonalardan tashqari, davlat ulushi mavjud barcha korxonalar bosqichma-bosqich xususiylashtiriladi”, dedi agentlik direktori.

 Korxonalarning xususiylashtirilishi davlat budjetini to‘ldirish uchun emas, balki ishlab chiqarish samaradorligi va biznesda raqobat muhitini yaxshilash maqsadida qilinishi lozimligini alohida ta'kidladi. Bu yo‘nalishdagi ishlar asosan strategik investorlar bilan hamkorlikda amalga oshirilayotganligi bois, yuzaga kelishi mumkin bo‘lgan ishsizlik darajasi ortish xavfining yuqori bo‘lmasligi aytildi.

 Uchrashuvda shuningdek, Birlashgan millatlar tashkiloti rivojlantirish dasturi va uning ahamiyati haqida ham so‘zlab berildi.

 Davlat korxonalari va aktivlari hisobidan budjetga tushumning umumiy miqdori va tarkibi, xususiylashtirilishi yoki davlat boshqaruvida qoldirilishi rejalashtirilgan korxonalar haqida so‘z bordi.

  Uchrashuv yakunida samarali hamkorlikka kelishib olingan.