Adliya vaziri o‘rinbosari: Korrupsiyaga qarshi samarali siyosat yuritish eng dolzarb masala bo‘lib qolyapti

Adliya vaziri o‘rinbosari Xudoyor Meliyev «O‘zbekiston Respublikasida korrupsiyaga qarshi kurash: yutuqlar va ustuvor vazifalar» mavzusida o‘tkazilgan xalqaro media-forumda O‘zbekistonda korrupsiyaga qarshi kurash dolzarb masala ekaniga to‘xtaldi.

«Korrupsiyaga qarshi turish, korrupsiyaga qarshi samarali siyosat yuritish mamlakatimiz uchun eng dolzarb masala bo‘lib qolyapti. Shu bilan birgalikda, shuni tan olish kerakki, korrupsiya ko‘plab mamlakatlar uchun muammo hisoblanadi va O‘zbekiston ham bundan mustasno emas.

Turli xalqaro reytinglardagi O‘zbekistonning joylashgan o‘rni ham bu haqda guvohlik bermoqda. Xususan, Transparency International tashkilotining Korrupsiyani idrok etish indeksi reytingi (reytingda O‘zbekiston 158-o‘rinda joylashgan). Shu sababdan O‘zbekiston ushbu dolzarb muammoni kompleks yondashuvni qo‘llagan holda hal etishga kirishdi», deya Xudoyor Meliyevning so‘zlarini keltirmoqda Kun.uz muxbiri.

Vazir o‘rinbosari o‘z nutqi davomida Davlat xizmatlari markazlarida ko‘rsatilayotgan davlat xizmatlari statistikasini keltirdi.

«Adliya vazirligi huzurida faoliyatining muhim yo‘nalishlaridan biri moslashuvchan, qulay, shaffof davlat xizmatlarini ko‘rsatish orqali byurokratizm va korrupsiyaga barham berish bo‘lgan Davlat xizmatlari agentligi tashkil etildi. Hozirgi kunda Davlat xizmatlari markazlari tomonidan 129 turdagi davlat xizmatlari ko‘rsatilyapti. 2020 yilga borib Davlat xizmatlari markazlari orqali ko‘rsatilgan davlat xizmatlari miqdori 160taga yetadi.

2019 yilning o‘zida 9,5 milliondan ortiq davlat xizmatlari ko‘rsatildi. Bu 2018 yil ko‘rsatkichidan 2 marta ko‘proq», deydi Xudoyor Meliyev.