Notariuslar bitimlarni videokonferensaloqa orqali tasdiqlashi mumkin. Bu qanday bo‘ladi?

Adliya vazirining buyrug‘i bilan Notariuslar tomonidan notarial harakatlarni amalga oshirish tartibi to‘g‘risidagi yo‘riqnomaga tuzatishlar kiritildi. Bu haqda Norma xabar bermoqda.
 
Eslatib o‘tamiz, shu yilning 1 yanvaridan boshlab taraflar turli hududlarda joylashgan notarial idoralarda bo‘lganda bitimlarni videokonferensaloqa rejimida notarial tasdiqlash imkoniyati paydo bo‘ldi. Bu kabi notarial tasdiqlash beriladigan arizalar asosida amalga oshiriladi va barcha turdagi bitimlarga tatbiq etiladi.
 
Videokonferensaloqa yordamida birinchi taraf notariusi, bitimni tegishlicha tushuntirgandan va matnini ovoz chiqarib o‘qib berganidan keyin uning rasmiylashtirilishini, shu jumladan barmoqlar izini skaner qilish jarayonini qayd etadi va bu haqda tegishli yozuvni amalga oshiradi. Shundan keyin notarius bitimni imzolaydi, muhr qo‘yadi va boshqa zarur hujjatlar bilan skaner qiladi va Avtomatlashtirilgan axborot tizimida joylashtiradi.
 
Ikkinchi taraf notariusi Tizimda joylashtirilgan bitim bilan bog‘liq hujjatlarni yuklab oladi va chop etadi. Tizim orqali bitimning birinchi tarafi murojaat qilgan notarius bilan videokonferensaloqa orqali videomuloqot o‘rnatadi, bunda notarius va notarial harakatni amalga oshirishda ishtirok etuvchi taraflar tasvirga to‘liq tushirilishi lozim. Shundan keyin ikkinchi taraf notariusi ikkinchi taraf bilan bitimni rasmiylashtirish bo‘yicha yuqorida ko‘rsatilgan kabi harakatlarni amalga oshiradi, bu ham videoda qayd etiladi.