Baxtiyor Sayfullayev Senatda qo‘mita raisi bo‘ldi. Endi u avvalgi lavozimlarini tark etadimi?

18 yanvar kuni O‘zbekiston Respublikasi prezidenti Shavkat Mirziyoyev farmoni bilan senator etib tayinlangan, 20 yanvar kuni yangi tarkibdagi Senatning ilk yalpi majlisida Yoshlar, madaniyat va sport masalalari qo‘mitasi raisi etib saylangan Baxtiyor Sayfullayevning oldingi lavozimlari taqdiri so‘roq ostida qolmoqda.

Ayni vaqtda u O‘zbekiston madaniyat vaziri (20 yanvar kuni Abdulla Aripov hukumati parlament oldida o‘z vakolatlarini zimmasidan soqit qilishini ma'lum qildi va barcha vazirlar o‘zidan v.b bo‘ldi — tahr) va O‘zbekiston davlat konservatoriyasi rektori hisoblanadi.

Kun.uz manbasi Baxtiyor Sayfullayev vazir lavozimini tark etishi va uning o‘rnini birinchi o‘rinbosari Ozodbek Nazarbekov egallashi kutilayotgani haqida ma'lum qildi.

Qayd etish kerakki, odatda hukumat a'zosi qoida tariqasida senator bo‘lolmaydi (avvalgi chaqiriqdagi Senatda senator bo‘lgan Agrippina Shin vazir bo‘lganidan keyin ham senatorligicha qolgandi). 

«O‘zbekiston Respublikasi Oliy Majlisining Senati to‘g‘risida»gi qonunga ko‘ra, Senat a'zolari Senatda doimiy asosda ishlashlari mumkin. Senatda doimiy asosda ishlovchi senatorlarning soni senatorlar umumiy sonining to‘rtdan birigacha bo‘lgan miqdorda belgilanadi. Ular senatorlik vakolatlari davrida ilmiy va pedagogik faoliyatdan tashqari haq to‘lanadigan boshqa turdagi faoliyat bilan shug‘ullanishlari mumkin emas.

Ammo qonunlarda qo‘mita raisi qanday asosda ishlashi to‘g‘risida aniq qoida keltirilmagan.

Ma'lumot uchun, avvalgi chaqiriqdagi Senat qo‘mitalari raislari Senatda doimiy asosda ishlagan va boshqa lavozimni egallamagan edi.

Baxtiyor Sayfullayev 2005 yildan Madaniyat va sport ishlari vazirining birinchi o‘rinbosari bo‘lgan, 2012 yildan O‘zbekiston davlat san'at va madaniyat instituti rektori lavozimida ishlay boshlagan, 2017 yil avgustida esa Madaniyat vazirligiga rahbar etib tayinlangandi.

O‘zbekiston xalq artisti Ozodbek Nazarbekov 2017 yilning iyunida «Yoshlar» telekanali direktori etib tayinlangan, bu lavozimda bir oy ishlagach, lavozimini tark etib telekanalda bosh prodyuser sifatida faoliyatini davom ettirgan, 2017 yilning avgustida esa madaniyat vaziriga o‘rinbosar bo‘lgandi.