12:00 / 28.01.2020
1
29481
Хитой ҳукумати Ухандаги хорижликларни эвакуация қилиш масаласини кўриб чиқмаяпти

Ўзбекистон Республикаси Ташқи ишлар вазирлиги Хитойда бўлиб турган ёки ушбу давлатга ташриф буюрмоқчи бўлган Ўзбекистон фуқароларига огоҳлантириш билан чиқди. Маълум қилинишича, Хитой ҳукумати ҳозирда чет эл фуқароларини Ухань шаҳридан эвакуация қилиш масаласини кўриб чиқмаётганини эълон қилган. 

Ўзбекистоннинг Пекин шаҳридаги элчихонаси берган маълумотга кўра 2020 йил 27 январь куни Хитой Халқ Республикаси Ташқи ишлар вазирлигида Пекин шаҳрида аккредитация қилинган чет эл дипломатик ваколатхоналари ва халқаро ташкилотлар раҳбарлари ва вакиллари учун брифинг бўлиб ўтган. 

Брифингда қуйидагилар таъкидланган: 

  • Хотиржамлик сақлашнинг зарурлиги. Саросимага тушиш вируснинг ўзидан ҳам кучлироқ таҳдид бўлиши мумкин. Хитой бугунгача вужудга келган барча кенг кўламли эпидемияларни бартараф этган, коронавирусни ҳам енгади; 
  • Коронавирусни даволаш имконли иш. Хитой барча имкониятларни ишга солмоқда. Агар Хитой ўз олдига бирор мақсад қўйса, албатта унга эришади;
  • Хитой чет эл фуқароларининг ўз ҳудудидаги хавфсизлигини таъминлаш бўйича барча халқаро мажбуриятларни бажаради. Вазирлик ва идоралар, шунингдек провинция ва шаҳарларнинг расмий идоралари чет эл дипломатик миссияларига уларнинг Ухань шаҳри ва Хитойнинг бошқа шаҳарларида муаммога дуч келган фуқаларолари хавфсизлигини таъминлаш борасида ҳар қандай кўмакни кўрсатишга тайёр. Ҳозирда Ухань шаҳри мамлакатнинг бошқа шаҳарларига қараганда хавфсизроқ. Чунки у ерга энг яхши мутахассислар, энг илғор қурилма ва технологиялар сафарбар қилинган. 

«Чет эл дипломатик ваколатхоналари ва халқаро ташкилотлар раҳбарлари ва вакилларининг саволларига жавоб бера туриб, Хитой томони мамлакат ҳукумати ҳозирда чет эл фуқароларини Ухан шаҳридан эвакуация қилиш масаласини кўриб чиқмаётганини эълон қилди. 

Элчихона январь ойида Ухандан ватанга қайтиб келган ўзбекистонлик талабаларни зудлик билан Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлиги билан +998909882330 (директор ўринбосари Б. Қурбонов),  +998972755074 (бош мутахассис Ф. Қурбонбеков) телефон рақамлари орқали боғланишни қатъий тавсия қилади. 

Ташқи ишлар вазирлиги Хитой ҳудудидаги Ўзбекистон фуқароларига зарур ҳолатларда исталган вақтда мамлакатимизнинг Пекин шаҳридаги элчихонасига +86 135 1102-4242 (Бобур Яхяев),  +86 139 1175-4476 (Шуҳрат Умиров) телефон рақамлари орқали ҳамда Шанхай шаҳридаги Бош консулхонасига +86 131 2255-5772 (Азиз Улуғбеков) телефон рақами орқали мурожаат қилишлари мумкинлигини эслатиб ўтади», дейилади ТИВ маълумотида.

  • 2019 йил 31 декабрда Хитойнинг Ухань шаҳрида номаълум турга мансуб пневмония касаллиги пайдо бўлгани ҳақида хабарлар тарқалди. Касалликка чалинганлар денгиз маҳсулотлари сотиладиган маҳаллий бозорда ишлайдиган одамлар эди. 
  • 7 январь куни пневмонияни янги 2019-nCoV коронавируси келтириб чиқаргани аниқланди. 20 январда шифокорлар вируснинг одамдан одамга юқиш хусусиятига эга эканлигини маълум қилди.
  • Сўнгги маълумотларга кўра, коронавирусини юқтириб олиш оқибатида вафот этганлар сони 106 нафарга етган, вирусдан зарарланганлар сони 4500 нафардан ошган, яна 6973 киши вирусни юқтириб олишда гумонланмоқда. Шу вақтгача 60 киши соғайиб, шифохонадан чиқарилган.
  • Сўнгги бир кун ичида 26та ўлим ҳолати қайд этилган, шундан 24 нафари Уханда, 1 нафари Пекинда ва яна бир нафари Хайнань провинциясида.
  • Хитойдан ташқари, Ҳонгконг, Макао, Тайван, Таиланд, Япония, Жанубий Корея, АҚШ, Канада, Вьетнам, Сингапур, Непал, Франция, Австралия, Малайзия, Камбожа ва Германияда коронавирусга чалиниш ҳолатлари қайд этилган.

Ўзбекистон Ташқи ишлар вазирлиги маълумотига кўра, айни пайтда Уханда тахминан 30 нафар Ўзбекистон фуқароси бор. 25 январь куни вазирлик раҳбари Абдулазиз Комилов улар ватанга қайтарилиши мумкинлигини айтган эди.

Мавзу
Хитой коронавируси
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top