13:13 / 04.02.2020
0
6309
Ўзбекистоннинг 2020 йилда МДҲдаги раислиги концепцияси тақдим этилди

Ўзбекистон Республикасининг 2020 йилда Мустақил Давлатлар Ҳамдўстлигидаги раислиги концепцияси эълон қилинди

Фото: ТАСС, Валерий Шарифулин

Ўзбекистон Республикасининг Мустақил Давлатлар Ҳамдўстлигидаги раислиги МДҲни янада ривожлантириш Концепцияси ҳамда Ташкилот доирасида ҳамкорликнинг турли йўналишлари бўйича қабул қилинган режалар ва дастурларга асосланган ҳолда амалга оширилади, деб хабар бермоқда Ташқи ишлар вазирлиги.

Билдирилишича, Ўзбекистон бир вақтнинг ўзида Давлат раҳбарлари кенгашида, Ҳукумат раҳбарлари кенгашида, Ташқи ишлар вазирлари кенгашида, Иқтисодий кенгашда ва Ҳамдўстликнинг бошқа тузилмалари ҳузуридаги аъзо давлатларнинг доимий ваколатли вакиллари кенгашида, МДҲ Иқтисодий кенгаши ҳузуридаги Иқтисодий масалалар бўйича комиссияда ҳам раислик қилади.

Ўзбекистоннинг раислиги МДҲнинг асосий ҳужжатларига мувофиқ тарзда ворислик тамойилидан келиб чиқади ва ривожланишнинг жадал динамикасини, иштирокчи давлатлар халқларининг фаровонлигини ва ҳаёт сифатини юксалтиришни таъминлаш мақсадида биринчи галда ташкилот иштирокчи давлатларининг тенглик, яхши қўшничилик, ўзаро манфаатларни ҳурмат қилиш ва ҳисобга олишга асосланган шерикчилик муносабатларини кенгайтириш ва мустаҳкамлашга йўналтирилади.

Ўзбекистон раислигининг устувор йўналишлари қуйидаги вазифаларни амалга оширишга қаратилади:

Ҳамдўстликни минтақавий давлатлараро ташкилот сифатида янада мустаҳкамлаш ва ривожлантириш, МДҲнинг халқаро майдондаги нуфузини ҳамда Ташкилотнинг кўп томонлама ҳамкорликнинг долзарб масалаларини ҳал қилишдаги ролини ошириш;

кўп қиррали ҳамкорликни мустаҳкамлаш ва Ташкилот иштирокчи давлатларининг МДҲ доирасида илгари сураётган ташаббусларини қўллаб-қувватлаш ва ҳаётга татбиқ этишга йўналтирилган саъй-ҳаракатларини бирлаштириш;

иштирокчи давлатларнинг ташқи сиёсат идоралари ўртасидаги шерикчиликни фаоллаштириш, томонларни қизиқтирган масалалар бўйича маслаҳатлашувлар ўтказиш ва уларни турли халқаро майдонларда илгари суриш;

МДҲ иштирокчи давлатларининг мамлакатлараро муносабатларнинг долзарб масалаларига ечимларни ишлаб чиқишдаги парламентлараро ҳамкорлигини кучайтириш;

МДҲ иштирокчи давлатларининг мамлакатлараро муносабатларнинг долзарб масалаларига ечимларни ишлаб чиқишдаги парламентлараро ҳамкорлигини кучайтириш;

МДҲ эркин савдо зонасининг ривожланиши ва тўлақонли фаолият кўрсатиши, янада кўпроқ иқтисодий ҳамкорлик қилиш учун қулай шароитлар яратиш, саноат кооперацияларини ривожлантириш, товарлар оқимининг тузилишини диверсификация қилиш бўйича фаолиятни фаоллаштириш ва товар айланмаси, жумладан қўшилган қиймати юқори бўлган товарлар ва бошқа талаб юқори бўлган маҳсулотлар номенклатурасини кенгайтириш, божхона тартибини соддалаштириш ҳамда қишлоқ хўжалиги маҳсулотларини ўзаро етказиб бериш чоғида «яшил йўлакларни» янада кенгроқ жорий қилиш;

транспорт коммуникацияларини ривожлантириш ва янада такомиллаштириш, шунингдек, Ҳамдўстлик давлатларининг транзит салоҳиятидан самарали фойдаланиш, келишилган ва самарали тариф сиёсатини амалга ошириш, юк ташишнинг қўшимча ҳажмларини жалб қилиш ва янги транспорт маршрутларини ташкил этиш, логистика марказларини ривожлантириш;

террористик ва экстремистик кучларга, наркотрафикка, уюшган жиноятчиликка ва кибер таҳдидларга қарши биргаликда ва ҳаракатларни мувофиқлаштирган ҳолда курашиш, ҳуқуқни муҳофаза қилиш органлари ва махсус хизматлар ўртасида ҳамкорлик қилиш;

ҳарбий соҳадаги ҳамкорликни янада мустаҳкамлаш ва ҳарбий-техник ҳамкорлик даражасини ошириш, МДҲ иштирокчи давлатлари ўртасидаги амалдаги шартнома ва битимлар доирасида қўшма дастур ва лойиҳаларни ишлаб чиқиш;

МДҲ доирасида илмий-техник шерикчилик ва инновацион ҳамкорликни ривожлантириш;

саноат ва қишлоқ хўжалиги тармоқларига, молия секторига рақамли технологияларни жорий қилиш ҳамда электрон хизматлардан фойдаланишни кенгайтириш бўйича лойиҳаларни биргаликда амалга ошириш;

маданий-гуманитар алоқаларни, таълим йўналишида ва ёшлар алмашинувларини, туризм соҳасидаги ҳамкорликни кенгайтириш.

«Ўзбекистоннинг раислиги даврида юқорида қайд этилган вазифаларни бажаришга қаратилган комплекс ва изчил чоралар амалга оширилади. Ҳамдўстликни янада ривожлантириш ва МДҲ иштирокчи давлатларининг интеграциясини чуқурлаштириш мақсадида Ҳамдўстлик доирасидаги ҳамкорлик механизмлари самарадорлигини ошириш бўйича келишилган чора-тадбирларни ҳаётга татбиқ қилишни ҳамда Ташкилот тузилмалари фаолиятининг замонавий воқеликка мослашишини кўзда тутувчи янги таҳрирдаги Ҳамдўстликни янада ривожлантириш Концепциясини қабул қилишни тезлаштириш бўйича ишлар фаоллаштирилади», - дейилади маълумотда.

Ташқи сиёсат

Ташқи сиёсат соҳасида сиёсий мулоқотлар амалиёти сақлаб қолинади, жумладан ташқи сиёсат идоралари ўртасидаги халқаро кун тартибининг долзарб масалалари бўйича, МДҲ иштирокчи давлатларининг халқаро ташаббусларини рўёбга чиқариш масалалари борасида маслаҳатлашувлар ўтказиш давом эттирилади.

Парламентлараро ҳамкорлик

Парламентлараро ҳамкорлик соҳасида Ҳамдўстлик низомидаги вазифаларни амалга оширишда парламентарийларнинг ролини мустаҳкамлаш мақсадида «парламент дипломатияси», хусусан МДҲ Парламентлараро Ассамблеяси доирасида ҳамкорликни фаоллаштириш учун мавжуд барча имкониятлар ишга солинади.

Иқтисодий ҳамкорлик

Иқтисодий ҳамкорлик соҳасида саъй-ҳаракатлар МДҲнинг 2030 йилгача бўлган давр учун Иқтисодий ривожланиш стратегиясини ва унинг биринчи босқичини амалга ошириш бўйича Тадбирлар режасини тайёрлашга, ўзаро савдода қулай шароитлар яратишга, жумладан божхона тартибини соддалаштиришга, савдодаги мавжуд истисно ва чекловларни, хусусан техник тўсиқларни бартараф этишга ҳамда иштирокчи давлатлар ҳудудлари ўртасидаги алоқаларни ривожлантиришга, жумладан МДҲнинг 2030 йилгача бўлган минтақалараро ва чегарадош ҳудудлар ҳамкорлиги Концепциясини ишлаб чиқиш ва қабул қилишга йўналтирилади. 2020 йилда Ўзбекистонда турли йўналишлар бўйича ҳудудлараро ҳамкорликни фаоллаштириш мақсадида МДҲ ҳудудлари Форуми ўтказилади.

Транспорт

Транспорт соҳасида янги транспорт маршрутларини ташкил этиш, МДҲ давлатларининг транзит салоҳиятидан кенг фойдаланиш бўйича аниқ чораларни назарда тутувчи Ташкилот иштирокчи давлатларининг 2030 йилгача ҳамкорлигининг Устувор йўналишларини тайёрлаш масалаларига алоҳида эътибор қаратилади.

Ҳуқуқни муҳофаза қилиш соҳасида

Ҳуқуқни муҳофаза қилувчи идоралар ва махсус хизматларнинг ҳамкорлиги соҳасида терроризм, экстремизм ва наркотрафикка қарши курашишда 2019-2023 йилларда жиноятчиликка қарши курашиш бўйича Давлалараро қўшма чора-тадбирлар дастурини, 2020-2022 йилларда терроризм ва экстремизмнинг бошқа зўравонлик кўринишларига қарши курашишда МДҲ иштирокчи давлатларининг Ҳамкорлик дастурини ҳамда Ташкилот иштирокчи давлатларининг ахборот хавфсизлигини таъминлаш Стратегиясини амалий бажариш борасида мақсадли ишлар йўлга қўйилади.

Ҳарбий ҳамкорлик

Ҳарбий ва ҳарбий-техник ҳамкорлик соҳасидаги ҳаракатлар ҳамкорликнинг эришилган даражасини сақлаб қолиш ва ривожлантиришга, шунингдек МДҲ иштирокчи давлатларининг 2025 йилгача бўлган ҳарбий ҳамкорлиги концепциясини тайёрлаш йўли билан янги истиқболли йўналишларни тараққий эттиришга ва ривожлантиришга йўналтирилади.

Илмий-техник соҳа

Илмий-техник ва инновацион ҳамкорлик соҳасида МДҲ иштирокчи давлатларининг 2030 йилгача бўлган Ҳукуматлараро инновацион ҳамкорлик дастурини тайёрлаш бўйича ишлар ташкил этилади. Мазкур дастурнинг амалга оширилиши илмий-технологик ишланмалар ва ихтиролардан самарали фойдаланиш, узоқ муддатли ҳамкорлик дастурларини амалга ошириш ва инновацион лойиҳаларни амалга чиқариш учун ресурсларни жамлаш имконини берувчи илмий-техник ва инновацион фаолиятни рағбатлантиришни кўзда тутади. Жамиятни рақамли ривожлантириш соҳасида информацион ҳамкорлик тўғрисида Битимни қабул қилиш бўйича ишлар фаоллаштирилади.

Маданий-гуманитар соҳа

Маданий-гуманитар соҳадаги ҳаракатлар ёшлар сиёсати, маданият ва спорт, фан ва таълим, соғликни сақлаш ҳамда туристик алоқаларни кенгайтириш жабҳасидаги ҳамкорликни янада ривожлантириш ва унинг ташкилий-ҳуқуқий асосларини такомиллаштиришга қаратилади. 2021-2030 йиллар учун мўлжалланган ёшлар ҳамкорлиги, туризм ҳамда жисмоний тарбия ва спортни ривожлантириш бўйича учта Стратегияларни тайёрлаш борасидаги ишлар ташкил этилади. Бу иштирокчи давлатларнинг ҳар бирида галма-гал МДҲ давлатларининг ҳар йилги туризм ярмаркаларини ва Маданият кунларини ўтказишни, Ҳамдўстлик ижодкор ёшларининг ҳар бири аниқ мавзуга бағишланган мунтазам учрашувларини ташкиллаштиришни ҳамда МДҲ мамлакатлари маданий меросининг виртуал музейини яратишни в.ҳ. назарда тутади. Ўзбекистон Республикаси «Ҳамдўстликнинг маданий пойтахти» Давлатлараро дастурини келгусида ҳам амалга ошишида фаол иштирок этади.

МДҲ Давлат раҳбарлари кенгашининг 2017 йил 11 октябрдаги 2020 йилни Ҳамдўстликда 1941-1945 йиллардаги Иккинчи жаҳон урушидаги ғалабанинг 75 йиллиги йили деб эълон қилиш тўғрисидаги қарорини бажарилиши тинчлик, ҳамфикрлик ва дўстлик муҳитини, шу жумладан МДҲ ёшлари ўртасидаги мустаҳкамлашга йўналтирилган биргаликдаги саъй-ҳаракатларни бирлаштиришга имкон беради.

1941-1945 йиллардаги Иккинчи жаҳон урушидаги ғалабанинг 75 йиллигига тайёргарлик кўриш ва уни нишонлаш бўйича асосий чора-тадбирлар Режасини бажариш, жумладан илмий-амалий конференциялар, семинарлар, ҳарбий-илмий ишлар бўйича халқаро танловлар, бадиий ва ҳужжатли фильм кинофестивали ҳамда ҳарбий оркестрларнинг мусиқий фестивали ва бошқа қўшма тадбирларни ўтказишга алоҳида эътибор қаратилади.

Ўзбекистон Республикаси Ҳамдўстлик халқлари ҳаёт даражасини яхшилаш учун қулай шароитларни яратишдаги МДҲнинг ролини янада кучайтириш ва ташкилотнинг нуфузини мустаҳкамлаш мақсадида кўп томонлама ҳамкорликнинг барча йўналишларидаги ишларни фаоллаштиришда бор имкониятларни ишга солади, дейилган маълумотда.

Ушбу хабарга фикрингизни билдиринг. Бунинг учун авторизациядан ўтишингиз керак!
Top