Mahalliy davlat hokimiyati organlari qarorlarini ishlab chiqish, kelishish va ro‘yxatdan o‘tkazishning yagona elektron tizimi joriy etiladi

Vazirlar Mahkamasining “Mahalliy davlat hokimiyati organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimini joriy etishning tashkiliy chora-tadbirlari to‘g‘risida”gi qarori loyihasi muhokama uchun joylashtirildi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, Yer resurslari, geodeziya, kartografiya va davlat kadastri davlat qo‘mitasi hokimliklar tomonidan 1993 yil 18 sentyabrdan 2020 yil 1 martga qadar qabul qilingan jismoniy va yuridik shaxslarga yer ajratish haqidagi o‘z kuchida bo‘lgan qarorlarni 2020 yil 1 sentyabrgacha xatlovdan o‘tkazib, tegishli hokimliklarning rasmiy veb-saytlarida e'lon qilinishini ta'minlaydi.

Axborot texnologiyalari va kommunikatsiyalarini rivojlantirish vazirligi Davergeodezkadastr hamda Adliya vazirligi bilan birgalikda quyidagilarni nazarda tutuvchi mahalliy davlat hokimiyati organlarining qarorlarini ishlab chiqish, kelishish va ro‘yxatdan o‘tkazishning yagona elektron – “E-hudud” tizimini 2021 yil 1 yanvarga qadar sinov tariqasida ishga tushirilishini ta'minlaydi:

mahalliy davlat hokimiyati organlarining qarorlarini ishlab chiqish va qabul qilish, ro‘yxatdan o‘tkazish, ularga takrorlanmaydigan maxsus raqam berish va avtomatik tarzda e'lon qilish jarayonini boshqarish va nazorat qilish, shu jumladan, zarurat tug‘ilganda mas'ul idoralar, boshqa organlar va tashkilotlar tomonidan loyihalarga elektron ko‘rinishdagi viza qo‘yishni amalga oshirish;

mahalliy davlat hokimiyati organlarining qarorlari loyihalarini ko‘rib chiqish va kelishish bo‘yicha idoralararo elektron hamkorlikni, shuningdek, ularni ishlab chiqish jarayoni monitoring qilinishini ta'minlash.

“E-hudud” elektron tizimdan foydalanishda quyidagilar davlat organlari va tashkilotlari hamda mahalliy davlat hokimiyati organlarining asosiy vazifalari etib belgilanadi:

a) Axborot texnologiyalari va kommunikatsiyalarini rivojlantirish vazirligi:

“E-hudud” elektron tizimining sifatli va uzluksiz faoliyat ko‘rsatishini ta'minlash;

“E-hudud” elektron tizimining funksional imkoniyatlarini kengaytirish bo‘yicha belgilangan tartibda choralar ko‘rish, tizimdan foydalanish jarayonida texnik yordam ko‘rsatish;

qonun hujjatlarida belgilangan tartibda “E-hudud” elektron tizimining axborot xavfsizligini ta'minlash;

tizimdan foydalanuvchilardan kelib tushgan takliflarni hisobga olgan holda “E-hudud” elektron tizimini muntazam takomillashtirish va modernizatsiya qilish;

b) Adliya vazirligi:

qarorlarni faqatgina “E-hudud” elektron tizimi orqali qabul qilish, ro‘yxatdan o‘tkazish, ularga takrorlanmaydigan maxsus raqam berish va avtomatik tarzda e'lon qilish jarayonining doimiy monitoringini amalga oshirish;

“E-hudud” elektron tizimi ishlash tartibi va mexanizmini tartibga soluvchi qonun hujjatlarini takomillashtirish yuzasidan takliflar tayyorlash;

mahalliy davlat hokimiyati organlari, boshqa davlat organlari va tashkilotlarning “E-hudud” elektron tizimidan samarali foydalanishlarini ta'minlash, shuningdek undan foydalanish masalasiga uslubiy rahbarlik qilish;

v) davlat organlari va tashkilotlari, shu jumladan mahalliy davlat hokimiyati organlari:

qarorlar loyihalarini ishlab chiqish jarayonlarini “E-hudud” elektron tizimi orqali to‘liq amalga oshirilishi bo‘yicha tezkor tashkiliy va texnik chora-tadbirlarni amalga oshirish;

qarorlarni qabul qilish, ro‘yxatdan o‘tkazish, maxsus raqamlash va avtomatik tarzda e'lon qilish jarayonida “E-hudud” elektron tizimidan majburiy foydalanish hamda qonunchilikda belgilangan tartib va muddatlarga qat'iy rioya qilish;

“E-hudud” elektron tizimini ishlash tartibi va mexanizmini takomillashtirish yuzasidan takliflar tayyorlash.

Belgilanishicha:

“E-hudud” elektron tizimining uzluksiz faoliyat ko‘rsatishi, texnik xizmat ko‘rsatish va qo‘llab-quvvatlash, shuningdek uning funksional imkoniyatlarini yanada takomillashtirish bilan bog‘liq xarajatlar Axborot-kommunikatsiya texnologiyalarini rivojlantirish jamg‘armasi hisobidan moliyalashtiriladi;

2021 yil yanvar–may oylarida Qashqadaryo viloyatida “E-hudud” elektron tizimini aprobatsiya qilish yuzasidan huquqiy eksperiment o‘tkaziladi.

Adliya vazirligi Axborot texnologiyalari va kommunikatsiyalarini rivojlantirish vazirligi bilan birgalikda eksperiment natijalaridan kelib chiqib zaruratga ko‘ra 2021 yil 15 iyunga qadar Vazirlar Mahkamasiga “E-hudud” elektron tizim faoliyatini yanada takomillashtirish bo‘yicha takliflar kiritadi.

2021 yil 1 iyuldan boshlab “E-hudud” elektron tizimi respublikaning barcha darajadagi mahalliy davlat hokimiyati organlarida joriy etiladi.