Bozorlarda ustunlik mavqeiga ega davlat ishtirokidagi korxonalar soni kamida 20 foizga qisqaradi

Harakatlar strategiyasini “Ilm-ma'rifat va raqamli iqtisodiyotni rivojlantirish yili”da amalga oshirishga oid davlat dasturi loyihasi e'lon qilindi.

2020 yil 1 aprelga qadar O‘zbekiston Respublikasi prezidenti qarori loyihasi ishlab chiqiladi. Loyihada:

davlat ishtirokidagi korxonalarni xatlovdan o‘tkazib, xususiy sektor va raqobat rivojlangan yo‘nalishlardagi korxonalarda davlat ishtirokini kamaytirish;

tovar va moliya bozorlarida ustunlik mavqeiga ega davlat ishtirokidagi korxonalar sonini kamida 20 foizga qisqartirish;

xususiy sektorni davlat organlari xo‘jalik funksiyasini bajaradigan sohalarga jalb qilish;

xususiylashtirish imkoni bo‘lmagan davlat korxonalari boshqaruviga professional menejyerlarni, xorijiy mutaxassislarni jalb qilish;

davlat organlari tomonidan ta'sis etilgan, raqobatga salbiy ta'sir ko‘rsatuvchi, davlat va tabiiy monopoliya sub'yektlari ishtirokidagi yirik xo‘jalik sub'yektlari bilan affillangan davlat unitar korxonalari sonini qisqartirish;

davlat ishtirokidagi korxonalarni tuzishda monopoliyaga qarshi kurashish organining oldindan roziligini olish mexanizmini joriy etish;

raqobat muhiti shakllangan, bazaviy tarmoq korxonalari bo‘lmagan korxonalardagi, jumladan donni qayta ishlash, alkogol mahsulotlari, qurilish materiallari ishlab chiqarish va boshqa tashkilotlarda davlat ulushlarini sotish va ularning yuqori turuvchi birlashmalarini tugatish;

“davlat unitar korxonasi” tashkiliy-huquqiy shaklini qonunchilikdan chiqarish bo‘yicha taklif tayyorlash;

davlat ishtirokidagi bazaviy va infratuzilmaviy korxonalarni isloh qilish, ular faoliyatiga moliyaviy hisobotning xalqaro standartlarini joriy etish, xalqaro auditdan o‘tkazish va xalqaro reyting olish;

Navoiy va Olmaliq tog‘-kon metallurgiya kombinatlari kabi yirik, yuqori daromad beradigan korxonalarni aksiyalashtirib, nazorat ulushini davlatda saqlab qolgan holda, aksiyalarning bir qismini sotuvga chiqarish;

2020 yilda xalqaro standartlar asosida moliyaviy hisobotlarni tuzish, zaxiralarni qayta hisoblash, korporativ oshkoralikni tatbiq etish ishlarni yakunlash;