Janubiy Koreya sog‘liqni saqlash vazirligi ma'lumotiga ko‘ra, shanba va yakshanba kunlari mamlakatda mos ravishda 229 va 123ta koronavirus yuqtirishning yangi holatlari aniqlangan. Endilikda mamlakatda ushbu virusdan zararlanganlarning jami soni 556 nafarni tashkil qilmoqda.
Mamlakat sog‘liqni saqlash vaziri o‘rinbosari Kim Gan Nip virus tarqalishi «jiddiy daraja»ga yetgani haqida ma'lum qilgan. Shu vaqtgacha Janubiy Koreyada 4 kishi virus yuqtirish oqibatida halok bo‘ldi. Hukumat qurbonlar soni ortishi mumkinligidan tashvishda.
Yakunlanayotgan hafta boshida ham Janubiy Koreyada yangi virus bilan xastalanganlar soni 30 kishidan kamroq edi, ammo payshanba kuni ularning soni 100 kishiga yetdi, juma kuni esa 200 kishidan oshib ketdi. Poytaxt Seuldan 300 kilometr masofada joylashgan va 2,4 million aholi istiqomat qiladigan Tegu shahri COVID-19 koronavirusining bosh o‘chog‘iga aylangan.
Janubiy Koreya koronavirusning uchinchi o‘chog‘iga aylandi. So‘nggi ma'lumotlar
21 fevral kuni Janubiy Koreya rasmiylari koronavirus epidemiyasi nasroniylarning «Sinchonji» diniy tashkiloti bilan bog‘liqligini ma'lum qildi. Ushbu sekta a'zosi hisoblangan 61 yoshli ayolda kasallik alomatlari 10 fevralda paydo bo‘lgan, ammo u virus bor-yo‘qligini aniqlab beruvchi testdan o‘tishni ikki marta rad etgan va bu qarorini xorijga chiqmagani bilan izohlagan. Ayolda COVID-19’ning borligi aniqlanguniga qadar, u kamida ikkita yakshanba ibodatida qatnashishga ulgurgan. U koronavirusni yuqtirib olgani tasdiqlangan Janubiy Koreyadagi 31-odam bo‘ldi, ayni vaqtda u ushbu virusning mamlakatdagi eng mashhur tarqatuvchisi hamdir. Kasallik unga kimdan yuqqani hozircha ma'lum emas. Ayni vaqtda mamlakatda 9 mingdan ortiq kishi karantinga olingan, ularning aksar qismi diniy sekta a'zolaridir.
Janubiy Koreya - koronavirus tarqalishi holatlari ko‘pligi bo‘yicha Xitoydan keyingi ikkinchi o‘rinda. Xitoyda so‘nggi ma'lumotlarga ko‘ra virusdan zararlanganlar soni - 76 936 kishiga yetgan, mamlakat hududida virusdan 2442 kishi vafot etgan.
