Ravshan Alimov: Iqtisodiy diplomatiya samaradorligi o‘ta past

Unda Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi Ravshanbek Alimov so‘zga chiqdi. U o‘z nutqida tashqi ishlar sohasidagi muammolarga to‘xtaldi. 

“Iqtisodiy diplomatiya samaradorligi o‘ta past. Tashqi ishlar vazirligi hisobotiga ko‘ra respublikaning xorijdagi diplomatik vakolatxonalari tomonidan o‘tgan yili 1200dan ortiq biznes-forumlar, 3700dan ortiq o‘zaro tashriflar o‘tkazildi. Ammo ularning amaliy natijasi deyarli yo‘q. Har xolda bunday ma'lumotlar keltirilmagan. Ma'lumki ayrim hollarda tadbirlar nomiga va samarasiz o‘tkazilmoqda”, - dedi Ravshan Alimov.

Uning ta'kidicha, investitsiyalarni jalb etish maqsadida o‘tkazilgan tadbirlarning tahlili ularni tashkil qilishda batamom yangi yondashuvlar lozimligini ko‘rsatmoqda. 

 “Afsuski, turli investitsion konferensiyalar ko‘pinchalik yuzaki tashkil etilmoqda, ularning natijadorligi past, vaholanki ular uchun muayyan miqdorda mablag‘lar sarflanadi. Qatnashuvchilarning miqdoriy ko‘rsatkichlarga urg‘u berib kelinmoqda. Vaholanki, zamonaviy tajriba maqsadli “targetlash”, ya'ni loyihaga bevosita aloqador 15-20ta ishtirokchilar bilan aniq muzokara afzalligini isbotlamoqda”, - dedi Ravshan Alimov.