O‘zbekistonda koronavirus aniqlanganining to‘rtinchi kuni – 18 mart holatiga ko‘ra, bemorlar soni 15 nafarni tashkil etmoqda.
Bemorlar soniga mos ravishda tibbiy niqob, antiseptik vositalar va immunitetni ko‘taruvchi dori vositalariga ham talab oshib boryapti. 17 mart kuni Kun.uz muxbiri vaziyatga oydinlik kiritish maqsadida «Grand Pharm» dorixonalar tarmog‘i rahbarlari bilan suhbatlashdi.
«Grand Pharm» boshqaruv hamkorlaridan biri Azizxo‘ja Shamsutdinovning ta'kidlashicha, vahimaga tushishga hech qanday asos yo‘q.
«Omborxonamizda barcha dori vostilari zaxirasi yetarli darajada turibdi», – deydi u.
«Oxirgi vaqtlarda tibbiy maskalarga, antiseptik vositalarga shuningdek, virusga qarshi antibiotiklarga talab yuqori. Kompaniyamiz tomonidan barcha kerakli tadbirlarni qilyapmiz. O‘zimizning dorixonalarga tezlik bilan dorilarni yetkazib berishga harakat qilyapmiz. Mana, ko‘rib turganingizdek, omborxonamizda barcha kerakli dori vositalarli yetarli.
Niqobni har ikki soatda almashtirish kerak. Bir kunda bir kishiga 8-10ta maska kerak bo‘lyapti. Biz ham talabga qarab buyurtmalarni berib boryapmiz. Lekin dorixonalarga yetkazib berishda bir oz qiyinchiliklar bor», dedi Azizxo‘ja Shamsutdinov.
Uning so‘zlariga ko‘ra, bu holat narx-navoga ta'sir qilmaydi.
«Bu holatning narx-navoga hech qanday ta'siri yo‘q. Qonun bo‘yicha narx-navolar belgilangan. Kompaniya rahbariyati narxlarni nazorat qilishmoqda. Xalqimiz xotirjam bo‘lishini, dorixonalarimizda narxlar bir xilda bo‘lishini aytib qolardim.
Dorixonalarga dori vositalarini yetkazib berishni 2 baravarga oshirdik. Bundan tashqari mahsulotlar kirib kelishda davom etmoqda. Hech qanday muammo yo‘q. Xalqimizdan esa xotirjam bo‘lishini so‘rab qolamiz», deydi Shamsutdinov.
Eslatib o‘tamiz, avvalroq birlamchi oziq-ovqat mahsulotlari bozoriga epidemiologik holatning ta'siri yuzasidan Korzinka va Makro supermarket tarmoqlari rahbarlari ham izoh berib, fuqarolarni xotirjamlikka chaqirgan edi.
