Sog‘liqni saqlash vazirligi huzuridagi «Farmatsevtika mahsulotlari xavfsizligi markazi» tomonidan farmatsevtika sohasida tadbirkorlik sub’yektlarini nazorat qilish uchun yangi elektron tizim joriy etilishi ko‘zda tutilmoqda.
Nizom loyihasida qayd etilishicha, «xavfni tahlil qilish» elektron tizimi farmatsevtika faoliyatiga oid qonunchilik talablarini buzish xavfi mavjud bo‘lgan tadbirkorlik sub’yektlarini aniqlashga xizmat qiladi.
Tizim orqali tadbirkorning qonunbuzilish xavfi aniq mezonlar va ballar asosida avtomatik ravishda baholanadi. Bunda dori vositalarini ishlab chiqarish, tayyorlash va ulgurji sotish bilan shug‘ullanuvchi sub’yektlar hamda dori vositalari va tibbiy jihozlarni chakana sotuvchi sub’yektlar uchun alohida ko‘rsatkichlar belgilangan.
Xavf darajasi uch toifaga bo‘linadi
Loyihaga ko‘ra, tadbirkorlik sub’yektlari 100 ballik tizim asosida baholanadi.
Xususan:
- 81 balldan 100 ballgacha - yuqori xavf;
- 61 balldan 81 ballgacha - o‘rta xavf;
- 61 ballgacha - past xavf toifasi hisoblanadi.
Yuqori va o‘rta xavf toifasiga kirgan tadbirkorlik sub’yektlarida profilaktika tadbirlari va tekshiruvlar amaldagi qonunchilik asosida o‘tkazilishi mumkin. Bunda tekshiruvlar faqat «Farmatsevtika mahsulotlari xavfsizligi markazi» vakolatiga kiruvchi masalalar doirasida amalga oshiriladi. Past xavf toifasiga kirgan sub’yektlarda esa tekshiruvlar o‘tkazilmaydi.
Tadbirkordan hujjat talab qilinmaydi
Xavf darajasini aniqlash uchun litsenziya va ruxsat berishga oid ma’lumotlar, statistik ko‘rsatkichlar, avval aniqlangan huquqbuzarliklar, yuridik va jismoniy shaxslarning murojaatlari, OAV, ijtimoiy tarmoqlar va veb-saytlardagi ma’lumotlardan foydalanish mumkin.
Shu bilan birga, xavfni tahlil qilish jarayonida tadbirkorlik sub’yektidan qo‘shimcha hujjat yoki axborot talab qilishga yo‘l qo‘yilmaydi. Tahlil jarayoni tadbirkor faoliyatini to‘xtatish, unga to‘sqinlik qilish yoki faoliyatiga to‘g‘ridan-to‘g‘ri aralashishni ham nazarda tutmasligi kerak.
