Ayrim turdagi eng zarur tovarlarni import qilishda boj va aksiz solig‘i stavkalari 0 foizgacha kamaytirilishi mumkin

Qayd etilishicha, koronavirus infeksiyasi tarqalishiga qarshi kuchaytirilgan tartibning amal qilish davrida O‘zbekiston Respublikasi Sog‘liqni saqlash vazirligi va Farmatsevtika tarmog‘ini rivojlantirish agentligi tomonidan taqdim etilgan ro‘yxat bo‘yicha bojxona chegarasi orqali o‘tkazilayotgan zarur dori vositalari, tibbiy buyumlar, tibbiy texnika, ularni ishlab chiqarish uchun ishlatiladigan xomashyo, materiallar va substansiyalarga nisbatan bojxona bojlari undirilmaydi

Davlat soliq qo‘mitasi, Davlat bojxona qo‘mitasi va Monopoliyaga qarshi kurashish qo‘mitasi tomonidan dori vositalari, tibbiy buyumlar, tibbiy texnika, ularni ishlab chiqarish uchun ishlatiladigan materiallar va substansiyalar, eng zarur tovarlar narxlari ustidan kunlik monitoring o‘tkazishni ta'minlaydi hamda ularning narxlarini sun'iy oshirish, sun'iy tanqislik va yuqori talabni vujudga keltirishga yo‘l qo‘ymaslik ustidan qat'iy nazorat o‘rnatadi.

Tartib amal qilish davrida, istisno tariqasida, O‘zbekiston Respublikasi prezidentining 2020 yil 29 yanvardagi F–5537-son farmoyishiga asosan tashkil etilgan O‘zbekiston Respublikasiga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasiga:

Vazirlar Mahkamasining 2011 yil 25 fevraldagi “Tayyor dori vositalarining importini tartibga solish to‘g‘risida”gi 49-son qarori bilan tasdiqlangan import qilishda qo‘shilgan qiymat solig‘i bo‘yicha imtiyoz tatbiq etilmaydigan dori vositalari va tibbiy buyumlar ro‘yxatiga kiradigan ayrim tayyor dori vositalari va tibbiy buyumlarga uch oygacha bo‘lgan muddatga qo‘shilgan qiymat solig‘i bo‘yicha imtiyoz amal qilishi to‘g‘risida qaror qabul qilish;

ayrim turdagi eng zarur tovarlar ro‘yxatini shakllantirish va ularni import qilishda uch oygacha bo‘lgan muddatga bojxona boji va aksiz solig‘i stavkalarini 0 foizgacha kamaytirish huquqlari berildi.