13:32 / 01.04.2020
27991
Коронавирус ҳақида ўзбекистонликлар энг кўп сўраётган саволлар маълум қилинди

15 мартдан 1 апрелгача Call-марказга 500 мингтадан кўпроқ қўнғироқ бўлган.

Соғлиқни сақлаш вазирлиги 15 март куни 1003 ягона қисқа рақамли Call-марказни ишга туширган эди. Бу орқали фуқаролар коронавирус билан боғлиқ барча саволларга малакали мутахассислардан тиббий асосланган жавоб ва тавсиялар олишмоқда.

Вазирлик хабарига кўра, Call-марказ тун-у кун фаолият кўрсатмоқда. Унда 200 нафардан ортиқ профессор ўқитувчилар, шифокорлар уч сменада узлуксиз фуқароларнинг мурожаатларига жавоб беришмоқда.

15 март куни соат 21:00да иш бошлаган Call-марказга бугун, 1 апрель соат 12:00гача 510 мингдан ошиқ қўнғироқ келиб тушган.

«Энг кўп берилаётган саволларга эътибор берадиган бўлсак, биринчи кунлари аҳоли коронавирус инфекцияси, унинг юқиш йўллари ва белгилари, профилактика қоидаларини билиш учун мурожаат қилишганди.

Ҳозирги кунга келиб, фуқаролар карантин қоидалари, кимлар кўчага чиқиши мумкин эмаслиги, кимларга эса бунга рухсат берилгани, COVID-19га қаерда таҳлил топшириш мумкинлиги, карантиндаги фуқароларнинг қайси муассасаларда эканлиги, уларнинг аҳволи каби қатор саволлар берилмоқда.

Шу билан биргаликда, касаллик белгилари қандайлиги ҳақидаги саволлар ҳалигача долзарблигини йўқотмаяпти», – дейилади хабарда.

Эслатиб ўтамиз, коронавирусга оид энг кўп берилаётган саволларга Kun.uz сайтининг қуйидаги алоҳида саҳифаси орқали ҳам жавоб олиш мумкин.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top