Rishtonda ixtisoslashtirilgan hunarmandchilik majmuasi tashkil etiladi

Vazirlar Mahkamasining “Farg‘ona viloyatining Rishton tumanida “Ixtisoslashtirilgan hunarmandchilik majmuasi” tashkil etish chora-tadbirlari to‘g‘risida”gi qarori loyihasi e'lon qilindi.

Farg‘ona viloyati hokimligi, Investitsiyalar va tashqi savdo vazirligi, Qurilish vazirligi, Savdo-sanoat palatasi, “O‘zsanoatqurilishbank” ATB, “O‘zkimyosanoat” AJning:

Farg‘ona viloyatining Rishton tumanida “Ixtisoslashtirilgan hunarmandchilik majmuasi”ni tashkil etish va uning hududida milliy hunarmandchilik, xalq badiiy va amaliy san'atini rivojlantirish;

Farg‘ona viloyati, Rishton tumani, “Farovonlik” MFY, To‘qimachi ko‘chasida joylashgan viloyat “Agrokimyohimoya” XAJga qarashli, umumiy yer maydoni 1,1 gektarga teng bo‘lgan “Rishton” nomli 4-sonli mineral o‘g‘it tarqatish shoxobchasini Rishton tuman hokimligi balansiga o‘tkazish;

keyinchalik ushbu yer uchastkasini “O‘zsanoatqurilishbank” ATBning investitsiya kompaniyasi – “SQB Capital” MChJga “Ixtisoslashtirilgan hunarmandchilik majmuasi”ni tashkil etish uchun ajratish to‘g‘risidagi takliflari qabul qilinishi mumkin.

“SQB Capital” MChJga:

2020 yilning yakuniga qadar “Ixtisoslashtirilgan hunarmandchilik majmuasi” hududida obektlarni belgilangan shaharsozlik normalari va qoidalariga rioya etgan holda qurishga;

istisno tariqasida “Ixtisoslashtirilgan hunarmandchilik majmuasi” hududida amalga oshiriladigan loyihalar doirasida loyihalash va pudrat tashkilotlarini, shuningdek, asbob-uskunalarni yetkazib beruvchilarni tender (tanlov) savdolari o‘tkazmasdan, eng yaxshi takliflarni tanlab olish asosida aniqlashga ruxsat etiladi.

“O‘zsanoatqurilishbank” ATBga “SQB Capital” MChJ tomonidan qurilish ishlarini moliyalashtirilishi uchun kredit mablag‘larini ajratish tavsiya etiladi.

Tadbirkorlik faoliyatini qo‘llab-quvvatlash davlat jamg‘armasi “SQB Capital” MChJga “O‘zsanoatqurilishbank” ATB tomonidan ajratilgan kredit bo‘yicha hisoblanadigan foiz to‘lovlari bo‘yicha xarajatlarni qoplash uchun kompensatsiya taqdim etadi.

“Hunarmand” uyushmasi “O‘zsanoatqurilishbank” ATB va “SQB Capital” MChJ bilan birgalikda:

2020 yil 31 may kuniga qadar milliy hunarmandchilik, xalq badiiy va amaliy san'atini rivojlantirish maqsadida tashkil etilayotgan “Ixtisoslashtirilgan hunarmandchilik majmuasi”ga joylashtirish uchun talabgor hunarmandlar ro‘yxatini shakllantiradi;

“Ixtisoslashtirilgan hunarmandchilik majmuasi”da qurib bitkaziladigan bino va inshootlarni hunarmandlarga sotish hamda ularga bino-inshootlarni sotib olish uchun imtiyozli kredit mablag‘lari ajratish bo‘yicha aniq mexanizm ishlab chiqib tasdiqlaydi.

Farg‘ona viloyati hokimligi “Hunarmand” uyushmasi bilan birgalikda 2020 yilning 31 mayigacha bo‘lgan muddatda tashkil etilayotgan “Ixtisoslashtirilgan hunarmandchilik majmuasi” hududida milliy hunarmandchilik mahsulotlari ishlab chiqarishni tashkil etish uchun “Hunarmand” uyushmasiga a'zo bo‘lgan hunarmandlar bilan hamkorlikda qurilishi rejalashtirilayotgan obektlarning loyiha eskizlarini va loyiha-smeta hujjatlari ishlab chiqilishini ta'minlaydi.

“SQB Capital” MChJ tomonidan obektlarning qurilish-montaj ishlari tayyorlangan loyiha eskizlari va loyiha-smeta hujjatlari asosida belgilangan shaharsozlik normalari va qoidalariga rioya etgan holda olib boriladi.

Farg‘ona viloyati hokimligi Energetika vazirligi va Uy-joy kommunal xizmat ko‘rsatish vazirligi, “Hududiy elektr tarmoqlari” AJ va “Hududgazta'minot” AJ bilan birgalikda “ixtisoslashtirilgan hunarmandchilik majmuasi” qurib foydalanishga topshirilguniga qadar “ixtisoslashtirilgan hunarmandchilik majmuasi” hududigacha tashqi muhandislik-kommunikatsiya tarmoqlarini olib kelinishi va uzluksiz ta'minlanishini (mavjud resurslardan kelib chiqqan holda) “Hududiy elektr tarmoqlari” AJ va “Hududgazta'minot” AJ muhandislik-kommunikatsiya infratuzilmasini rivojlantirish mablag‘lari hisobiga amalga oshiradi.