«Qizilqumsement»da klinker ishlab chiqarish bo‘yicha to‘rtinchi texnologik liniya quriladi

Vazirlar Mahkamasining “Qizilqumsement” AJda klinker ishlab chiqarish bo‘yicha to‘rtinchi texnologik liniyani qurish” investitsiya loyihasining texnik-iqtisodiy asoslanishini tasdiqlash to‘g‘risida”gi qarori loyihasi e'lon qilindi.

“O‘zsanoatqurilishmateriallari” uyushmasining yiliga 1,8 mln klinker ishlab chiqarish quvvatiga ega, umumiy qiymati 112,63 mln yevroga teng bo‘lgan “Qizilqumsement” aksiyadorlik jamiyatida klinker ishlab chiqarish bo‘yicha to‘rtinchi texnologik liniyani qurish” investitsiya loyihasini 2020-2021 yillarda amalga oshirish to‘g‘risidagi taklifiga rozilik beriladi.
 
Investitsiya loyihasining moliyalashtirish manbalari etib quyidagilar belgilanadi: 

“Hamkorbank” ATBning 19,81 mln yevro miqdoridagi krediti;

“Qizilqumsement” AJning 92,82 mln yevro miqdoridagi o‘z mablag‘lari.

“Qizilqumsement” AJda klinker ishlab chiqarish bo‘yicha to‘rtinchi texnologik liniyani qurish” investitsiya loyihasi texnik-iqtisodiy asoslanishining asosiy texnik-iqtisodiy parametrlari tasdiqlanadi.

Investitsiya loyihasi “tayyor holda topshirish” sharti asosida (Engineering Procurement Construction) “fast-track” uslubida (bir vaqtning o‘zida loyihalash, xarid qilish va qurilish ishlari) amalga oshirilib, “Qizilqumsement” AJ belgilangan tartib va muddatlarda loyiha-smeta hujjatlarini ishlab chiqilishi va vakolatli ekspertiza organlarida ma'qullanishi ta'minlanadi.
     
O‘zbekiston Respublikasi Qurilish vazirligi shaharsozlik faoliyati sub'yektlari tomonidan qurilish-ta'mirlash ishlarini loyiha hujjatlariga muvofiq amalga oshirilishi ustidan nazoratni amalga oshirilishini belgilangan tartibda ta'minlaydi.  
     
O‘zbekiston Respublikasi Ekologiya va atrof-muhitni muhofaza qilish davlat qo‘mitasi loyiha hujjatlarining davlat ekologiya ekspertizasidan o‘tkazilishini va investitsiya loyihasini amalga oshirishda tabiatni muhofaza qilishga oid qonunchilikka rioya qilinishi ustidan lozim darajada nazorat o‘rnatilishini belgilangan tartibda ta'minlaydi.

O‘zbekiston Respublikasi Tashqi ishlar vazirligi “O‘zsanoatqurilishmateriallari” uyushmasining buyurtmanomalariga asosan investitsiya loyihasini amalga oshirishda ishtirok etadigan xorijiy mutaxassislarga kirish vizalari, shu jumladan ko‘p martalik vizalar rasmiylashtirilishini (muddati uzaytirilishini) belgilangan tartibda ta'minlaydi.

Investitsiya loyihasini amalga oshirish doirasida olib kiriladigan texnologik uskunalar, ularning butlovchi va ehtiyot qismlari, materiallar, buyumlar, asboblar, instrumentlar, texnologik hujjatlar -  O‘zbekiston Respublikasida akkreditatsiya qilingan tegishli sinov laboratoriyalari mavjud bo‘lmagan taqdirda, istisno tariqasida, majburiy sertifikatlashtirishdan ozod qilinadi.