Saudiya Arabistoni darra urib jazolashdan voz kechmoqda

Qirol Salmon ibn Abdulaziz Ol Saud va uning o‘g‘li, valiahd shahzoda Muhammad ibn Salmon Ol Saud tomonidan o‘tkazilayotgan inson huquqlari sohasidagi islohotlar doirasida shunday qarorga kelingan.

Jinoyatchilarga endi darra urish o‘rniga jazoning boshqa ko‘rinishlari qo‘llaniladi: jarimalar yoki ozodlikdan mahrum etish. Reuters’ning qayd etishicha, shariat qonun-qoidalariga to‘g‘ri keladigan huquq tizimining tartibga solinmaganligi qozilarning diniy matnlarni o‘zlaricha talqin qilishiga zamin yaratgan. Shu sababli darra urib jazolash qo‘llaniladigan jinoyatlar doirasi juda keng bo‘lgan.

Huquqni himoya qilish tashkilotlari shilqimlik qilish, jamoat joylarida mast holda bo‘lish kabi holatlar uchun ham darra bilan jazolash holatlari ro‘y berganini qayd etishgan.

Darra urish bilan bog‘liq eng rezonansli vaziyat 2015 yilda ro‘y bergan, deb eslatadi BBC. O‘shanda bloger Roif Badaviy kiberjinoyatchilik va Islom dinini tahqirlagani uchun 1000 darra jazoga hukm qilingan, biroq xalqaro norozilikdan so‘ng jazo bekor bo‘lgan.