MEED nashri maʼlumotiga koʻra, Saudiya Arabistoni Davlat investitsiya jamgʻarmasi - PIF ushbu loyiha yuzasidan qurilish kompaniyalariga murojaat qilgan. Jarayonni jamgʻarmaning shuʼba korxonasi - Tower District Real Estate Development Company olib bormoqda.
Bozorni oʻrganish jarayoniga tajribali xalqaro pudratchilar va Saudiyaning bir qator yirik qurilish kompaniyalari taklif etilgan. Bu bosqich ehtimoliy ijrochilarning imkoniyatlari va loyihaga qiziqishini baholashga qaratilgan.
Ikki kilometrlik minora Ar-Riyod chekkasida barpo etilishi rejalashtirilayotgan yangi markaziy ishbilarmonlik hududining asosiy inshooti boʻladi.
PIF 2025-yil iyun oyida ushbu hudud boʻyicha loyihani boshqarish va maslahat xizmatlarini koʻrsatishga qiziqqan kompaniyalardan takliflar olgan. Mazkur shartnoma minora qurilishini ham, uning atrofidagi ishbilarmonlik hududini yaratish jarayonini ham boshqarishni qamrab oladi.
Xabarga koʻra, ushbu xizmatlar boʻyicha tenderda ishtirok etish uchun AQShning Aecom, Jacobs, Parsons va Turner, shuningdek, Britaniyaning Mace kompaniyalariga taklif yuborilgan.
Loyiha meʼmori sifatida Britaniyaning Foster & Partners byurosi tanlangan. Byuro 2022-yil oxirida eʼlon qilingan xalqaro tanlovda gʻolib boʻlgan.
Rejalashtirilayotgan balandlik - 2 ming metr. Bu dunyodagi eng baland bino hisoblangan «Burj Xalifa» balandligidan qariyb 2,4 baravar koʻp. Minora Saudiyaning Jidda shahrida qurilayotgan, balandligi bir kilometrdan oshishi koʻzda tutilgan osmonoʻpar binodan ham ancha baland boʻlishi kutilmoqda.
Mintaqada oʻta baland binolar qurilishi xarajatlarini avval baholagan pudratchilarning hisob-kitoblariga koʻra, ikki kilometrlik minorani barpo etish taxminan 5 milliard dollarga tushishi mumkin. Yakuniy qiymat loyihaning tasdiqlanadigan yechimlariga bogʻliq boʻladi.
Minora va uning atrofidagi markaziy ishbilarmonlik hududi Project Rise deb nomlangan. U Ar-Riyod shimolidagi North Pole yirik kompleks qurilish loyihasining bir qismi hisoblanadi.
Hozircha xabarda qurilishni boshlash va yakunlashning aniq muddatlari keltirilmagan.
