Iqtisodiyot tarmoqlari va ijtimoiy sohani kuz-qish davriga tayyorlash bo‘yicha prezident qarori qabul qilinadi
|14:16 / 06.05.202012 60512 min
Respublika iqtisodiyoti tarmoqlari va ijtimoiy sohani 2020/2021 yillar kuz-qish davrida barqaror ishlashga kompleks tayyorlashni ta'minlash chora-tadbirlari qabul qilinadi.
Prezidentning “Respublika iqtisodiyoti tarmoqlari va ijtimoiy sohani 2020/2021 yillar kuz-qish davrida barqaror ishlashga kompleks tayyorlashni ta'minlash chora-tadbirlari to‘g‘risida”gi qarori loyihasi muhokama uchun joylashtirildi.
Qayd etilishicha:
O‘zbekiston Respublikasi Vazirlar Mahkamasi qoshida Iqtisodiyot tarmoqlari, ijtimoiy soha obektlarini kuz-qish davrida barqaror ishlashga tayyorlash, iste'molchilarni elektr energiyasi, tabiiy va suyultirilgan gaz, ko‘mir mahsulotlari bilan uzluksiz ta'minlash jarayonining borishini o‘rganish va nazorat qilish, xususiy uy-joy mulkdorlari shirkatlari faoliyatini muvofiqlashtirish, issiqlik energiyasi va ichimlik suv yetkazib berish bo‘yicha respublika shtabi tashkil etilgan;
respublika iqtisodiyoti tarmoqlarini 2019/2020 yillar kuz-qish davrida barqaror ishlashga tayyorlash bo‘yicha bajarilgan ishlar natijalarini tanqidiy tahlil qilish asosida ijtimoiy infratuzilma, asosiy turdagi yoqilg‘i-energetika resurslarini jamg‘arish, sektor, mahalla va barcha ko‘p kvartirali turar joy fondi bo‘yicha aniqlangan kamchiliklar Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan bartaraf etilgan.
Quyidagilar:
a) respublika iqtisodiyoti tarmoqlari va ijtimoiy sohani 2020/2021 yillar kuz-qish davrida barqaror ishlashga tayyorlash bo‘yicha kompleks chora-tadbirlar rejasi;
b) transport, kommunikatsiyalar, qurilish va uy-joy kommunal xo‘jaligi masalalari bo‘yicha ishchi guruh tarkibi;
v) asosiy muhandislik kommunikatsiyalari va texnologik uskunalarni 2020/2021 yillar kuz-qish davrida barqaror ishlashga tayyorlash, xususan, markaziy va mahalliy qozonxonalar, issiqlik va ichimlik suv tarmoqlarida mukammal va joriy ta'mirlash ishlari asosiy ko‘rsatgichlari;
g) ko‘p kvartirali uy-joy fondini hududlar bo‘yicha 2020/2021 yillar kuz-qish davrida barqaror ishlashga tayyorlash mukammal va joriy ta'mirlash ko‘rsatkichlari tasdiqlanadi.
Transport, kommunikatsiyalar, qurilish va uy-joy kommunal xo‘jaligi masalalari bo‘yicha ishchi guruh (O.Ramatov)ga:
viloyatlar, shaharlar va ayniqsa qishloq tumanlarida ko‘p kvartirali uylarni bo‘lajak kuz-qish davrida barqaror ishlashga tayyorlashni, mahalliy avtomobil yo‘llari, ko‘chalar va umumiy foydalaniladigan joylar, lift uskunalari, markazlashtirilgan va mahalliy qozonxonalar, issiqlik, ichimlik suv hamda kanalizatsiya tarmoqlari va mahallalar hududlarining sanitariya holati talablariga muvofiq tartibga keltirilishini joylarga chiqqan holda nazorat qilish;
Mavzuga oid
o‘rganish natijalari ko‘ra obektlarni kuz-qish davriga tayyorlash uchun mas'ul bo‘lgan barcha tuzilmalarning faoliyati muvofiqlashtirish;
mavjud muammolarni hal qilish va aniqlangan kamchiliklarni bartaraf etish, mahalliy ijro etuvchi hokimiyat organlari rahbarlarining shaxsiy mas'uliyatini oshirish yuzasidan zarur chora-tadbirlar ko‘rish topshiriladi.
Yoqilg‘i-energetika sohasi masalalari bo‘yicha ishchi guruh tarkibi, 2020/2021 yillar kuz-qish davrida issiqlik ta'minoti korxonalari uchun ko‘mir, mazut va texnik tuz tayyorlash, shuningdek, aholiga suyultirilgan gazni hududlar bo‘yicha yetkazib berish topshiriqlari, 2020/2021 yil kuz-qish davrida aholi xonadonlarini va ijtimoiy soha obektlarini ko‘mir va ko‘mir briketi mahsulotlari bilan ta'minlash ko‘rsatkichlari tasdiqlanadi.
Yoqilg‘i-energetika sohasi masalalari bo‘yicha ishchi guruh (A.Sultonov)ga:
viloyatlar, shaharlar va ayniqsa qishloq tumanlarida aholiga suyultirilgan gaz va ko‘mir yoqilg‘isi bilan ta'minlash, issiqlik va elektr energiyasini ishlab chiquvchi tashkilotlarga yoqilg‘i resurslarni uzluksiz yetkazib berish bo‘yicha barcha masalalarni tartibga keltirilishini joylarga chiqqan holda nazorat qilish;
transformator podstansiyalarini ta'mirlash hamda ularning barqaror ishlashini ta'minlanishi, tabiiy va suyultirilgan gaz yetkazib berilishi, ko‘mir mahsulotlarining g‘amlanishi bilan bog‘lik muammolarni o‘z vaqtida hal qilish va kamchiliklarni bartaraf etish uchun joylarga chiqib, aholi bilan uchrashuvlar o‘tkazish;
2019/2020 yil kuz-qish mavsumi tajribasidan kelib chiqqan holda avtomobillarga gaz to‘ldirish kompressor shoxobchalari bilan tuziladigan shartnoma loyihalarini huquqiy jihatdan bugungi kunda ushbu obektlarga qo‘yilayotgan talablardan kelib chiqib, tubdan qayta ko‘rib chiqish;
tadbirkorlik sub'yektlari va aholi tomonidan tabiiy gazdan noqonuniy foydalanish, talon-torojlik holatlari aniqlanganda ular bilan tuzilgan shartnomalarni bir tomonlama bekor qilish mexanizmini joriy etish topshiriladi.
“O‘zbekneftgaz” AJ (Abdullayev), “Hududiy elektr tarmoqlari” AJ (Mustafoyev), “O‘ztransgaz” AJ (Saidov), “Hududgazta'minot” AJ (Eshmurodov), “O‘zbekko‘mir” AJ (Odilov) rahbarlari asosiy yoqilg‘i-energetika resurslari va ko‘mir mahsulotlari barcha toifadagi iste'molchilarga o‘z vaqtida yetkazib berilishi bo‘yicha tadbirlarni so‘zsiz bajarilishi uchun shaxsan mas'ul ekanligi belgilab qo‘yiladi.
Hududlardagi shifoxonalar va tibbiyot punktlarini hamda ularga xizmat ko‘rsatuvchi qozonxonalar, suv inshootlari hamda nasos stansiyalarini uzluksiz elektr energiyasi va tabiiy gaz bilan ta'minlash choralari ko‘riladi.
Bunda, tibbiyot muassasalarini ta'minlovchi elektr uzatish va gaz ta'minoti tarmoqlarida cheklovlar uchun energoresusrlardan uzib qo‘yish holatlari taqiqlab qo‘yiladi va o‘rganish natijalari bo‘yicha obektlarni kuz-qish davriga tayyorlash uchun mas'ul bo‘lgan barcha tuzilmalarning faoliyatini muvofiqlashtirish vazifasi yuklanadi.
Mavjud muammolarni hal qilish va aniqlangan kamchiliklarni bartaraf etish, joylardagi kompleks rahbarlarining shaxsiy mas'uliyatini oshirish yuzasidan zarur chora-tadbirlar ko‘riladi.
Ijtimoiy soha obektlarini kuz qish mavsumida barqaror ishlashini ta'minlash bo‘yicha ishchi guruh tarkibi, ijtimoiy soha obektlarini 2020/2021 yillar kuz-qish davrida barqaror ishlashga tayyorlash mukammal va joriy ta'mirlash rejasining asosiy ko‘rsatkichlari tasdiqlanadi.
Ijtimoiy soha obektlarini kuz-qish mavsumida barqaror ishlashini ta'minlash bo‘yicha ishchi guruh (A.Abduhakimov)ga:
ijtimoiy soha obektlarni kuz-qish mavsumiga barqaror tayyorlash maqsadida tegishli vazirlik, idora, xo‘jalik birlashma va hududiy hokimliklarni jalb etgan holda hududlarda amalga oshirilayotgan ishlarni doimiy monitoring qilish;
viloyatlar, shaharlar va ayniqsa qishloq tumanlarida ijtimoiy soha obektlarini barqaror ishlashga tayyorlash ishlarini, shu jumladan maktabgacha ta'lim muassasalari, maktablar va sog‘likni saqlash vazirligi obektlarini mavsumga puxta tayyorgarlik ko‘rilishi, bunda binolarning ichki issiqlik ta'minoti tizimlari sozligi, oyna va eshiklar issiqlik energiyasini saqlab qolishiga moslashtirilganligi, binolarning tom va devorlarning yon qismlarini to‘liq ta'mirlaganligi va kuchli yog‘ingarchilik davrida chakka o‘tishi oldini olishga tayyorligini hamda hududlarining sanitariya holati talablariga muvofiq tartibga keltirilishini joylarga chiqqan holda nazorat qilish;
o‘rganish natijalari bo‘yicha obektlarni kuz-qish davriga tayyorlash uchun mas'ul bo‘lgan barcha tuzilmalarning faoliyatini muvofiqlashtirish topshiriladi.
Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlariga:
iqtisodiyot tarmoqlari, kommunal, transport va ijtimoiy soha obektlarni 2020/2021 yillar kuz-qish davrida barqaror ishlashga tayyorlash bo‘yicha belgilangan 3 ta yo‘nalishlar bo‘yicha hududiy ishchi guruhlarni tashkil etib, rahbarlik qiladilar hamda belgilangan ishlarni o‘z vaqtida va sifatli bajarilishi uchun shaxsiy mas'uliyati alohida belgilab qo‘yiladi;
muhandislik kommunikatsiyalari va texnologik uskunalarni 2020/2021 yillar kuz-qish davrida barqaror ishlashga tayyorlash, xususan, markaziy va mahalliy qozonxonalar, issiqlik va ichimlik suv tarmoqlarida mukammal va joriy ta'mirlash ishlarini amalga oshirilishi belgilangan ishlar bo‘yicha talab etiladigan mablag‘lar mahalliy budjet hisobidan o‘z vaqtida ajratilishi ta'minlanadi.
O‘zbekiston Respublikasi bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari O‘.Barnoyev Iqtisodiy taraqqiyot va kambag‘allikni qisqartirish vazirligi, “O‘zbekoziqovqatzaxira” uyushmasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari 2020 yil 1 sentyabrgacha bo‘lgan muddatda:
O‘zbekistonda Respublikasida ilk bor koronavirus infeksiyasi (pandemiya) aniqlanishida yuzaga kelgan karantin davrida amalga oshirilayotgan ishlar doirasida Respublika uchun og‘ir sharoitda to‘plangan tajribadan kelib chiqqan holda chuqur tahlil natijalari asosida aholining ehtiyojlaridan kelib chiqib, viloyatlar, shaharlar va tumanlar bo‘yicha 2020/2021 yillar qish-bahor davri uchun qishloq xo‘jaligi mahsulotlari asosiy turlarini g‘amlashning real hajmlarini belgilaydi;
bunda narxlarning keskin ko‘tarilib ketishiga yul qo‘ymaslik maqsadida kartoshka, piyoz, sabzi, karam, guruch va dukkakli ekinlar mahsulotlarini g‘amlashga alohida e'tibor qaratiladi;
g‘amlanishi kerak bo‘lgan qishloq xo‘jaligi mahsulotlarining asosiy turlarini saqlashning zarur sharoitlarini ta'minlash hamda g‘amlashning to‘liqligi va mahsulotlarning zarur tarzda saqlanishi uchun mas'ul shaxslarni belgilash bo‘yicha aniq takliflar belgilangan tartibda kiritiladi.
Olis tog‘li hydudlarda joylashgan va sel kelishi oqibatida yo‘llari talafot ko‘rish ehtimoli bo‘lgan qishloqlarda kamida 15-20 kunga yetadigan asosiy turdagi oziq-ovqat hamda yoqilg‘i energetika resurslari zaxirasi yaratilishi ta'minlanadi.
“O‘zbekoziqovqatzaxira” uyushmasi raisi Z.O.Fayziyev zimmasiga qishloq xo‘jaligi mahsulotlarining asosiy turlarini zaxiraga g‘amlashning to‘liq hajmda va belgilangan muddatlarda ta'minlanishi uchun shaxsiy mas'uliyat yuklanadi.
Markaziy bank (Nurmurodov) Tijorat banklari tomonidan qishloq xo‘jaligi mahsulotlarini tayyorlovchi tashkilotlarga hamda uy-joy fondini 2020-2021 yillar kuz-qish mavsumida barqaror ishlashga tayyorgarlik qo‘rish bo‘yicha amalga oshirilishi lozim bo‘lgan mukammal ta'mirlash ishlari uchun imtiyozli kreditlar o‘z vaqtida ajratilishini ta'minlaydi.
O‘zbekiston Respublikasi Moliya vazirligi (Ishmetov):
Respublika komissiyasining xulosasiga ko‘ra, o‘tkir zarurat mavjud bo‘lgan hududlarda iqtisodiyot tarmoqlari va ijtimoiy sohani kuz-qish davriga tayyorlash bo‘yicha amalga oshirilayotgan ishlarni o‘z vaqtida moliyalashtirish uchun qo‘shimcha zaxiralarni shakllantiradi.
Xalqaro moliyaviy institutlardan Koronavirus global pandemiyasining salbiy oqibatlariga qarshi kurashish chora-tadbirlari uchun grantlar va uzoq muddatli imtiyozli moliyalashtirishni jalb qilinayotgan mablag‘lar, xususan:
sog‘liqni saqlash tizimini qo‘llab-quvvatlash uchun Osiyo infratuzilmaviy investitsiyalar bankidan (OIIB) 100 mln dollar miqdorda mablag‘larni;
meva-sabzavot sektoridagi korxonalarni moliyalashtirish maqsadida JICA’ning 200,0 mln dollar mablag‘larni;
energetika sohasidagi islohotlarni amalga oshirish uchun OTB (200 mln dollar) va Fransiya taraqqiyot agentligining (150 mln yevro) budjetni qo‘llab-quvvatlash qarz mablag‘larini;
kommunal va energetika korxonalarining aylanma mablag‘larini qo‘llab-quvvatlash maqsadida YeTTBning 100,0 mln dollar mablag‘larni o‘z muddatlarda jalb qilish va maqsadli foydalanishni ta'minlash yuzasidan tezkor choralar ko‘riladi.
