Davlat rahbarining topshirig‘idan kelib chiqib, bosh vazir o‘rinbosari, Turizmni rivojlantirish davlat qo‘mitasi raisi Aziz Abduhakimov boshchiligida Xonobod shahrini Farg‘ona vodiysining turizm markaziga aylantirishga doir tegishli ishlar olib borildi, deb xabar bermoqda qo‘mita matbuot xizmati.
Xabarda aytilishicha, Aziz Abduhakimov Andijon viloyatidagi qator turizm obektlari holati bilan tanishdi hamda Xonobod shahri hokimligi, turizm yo‘nalishida faoliyat olib borayotgan tashkilotlar vakillari, tadbirkorlar bilan shaharni turizm markaziga aylantirish, viloyatda turistik qishloqlarni tashkil qilish hamda ichki turizmni rivojlantirish borasida uchrashuv o‘tkazdi.
Uchrashuv davomida hokimlik va tegishli idoralar mas'ullari, turistik xizmatlar ko‘rsatish bilan shug‘ullanuvchi tadbirkorlar, turistik obektlar rahbarlari bilan mavjud muammolar ko‘tarilib, hududda turizmni rivojlantirishga oid taklif va mulohazalar almashildi.
“Yig‘ilishda sayyohlarni jalb etishga doir jahon tajribasi haqida so‘z yuritildi hamda mas'ullarga prezident topshiriqlari ijrosini amalga oshirish bo‘yicha zarur tavsiya va ko‘rsatmalar berildi. Mazkur tavsiya va ko‘rsatmalarni amalga oshirish maqsadida Turizmni rivojlantirish davlat qo‘mitasi, qo‘mitaning Andijon viloyat hududiy boshqarmasi, hokimlik va tegishli tashkilot va idoralar vakillari 25 maydan e'tiboran Xonobod shahrida doimiy o‘rganishlarni yo‘lga qo‘ydi.
Xususan, shahar hokimligida qator tashkilot va idoralar rahbarlari bilan bo‘lib o‘tgan yig‘ilishda Xonobodni turizm markaziga aylantirish, uning konsepsiyasini yaratish bo‘yicha Prezident topshirig‘i ijrosini o‘z vaqtida va sifatli amalga oshirish masalalari hamda viloyatda koronavirus pandemiyasi bilan bog‘liq sanitar-gigiyenik holat muhokama qilindi. Ushbu vazifalar ijrosini ta'minlash va nazorat qilish maqsadida hokimlik, tegishli tashkilot va idoralar vakillaridan iborat maxsus ishchi guruh tuzildi. Ishchi guruh Xonoboddagi turistik obektlar holatini o‘rganib chiqdi, ayni damda aniqlangan kamchiliklarni bartaraf etish bo‘yicha tegishli chora-tadbirlar dasturi ishlab chiqilmoqda. Shuningdek, turizm yo‘nalishida investitsiyalar jalb etishga oid ishlarni jadallashtirish haqida so‘z yuritildi”, deyiladi xabarda.
Yig‘ilishdan so‘ng Aziz Abduhakimov ishchi guruh vakillari bilan birgalikda tadbirkorlar murojaati asosida bayon qilingan kamchiliklarni o‘rganib, ularni bartaraf etish maqsadida joylarga borib turistik obektlarni ko‘zdan kechirdi va mas'ullarga turizm tadbirkorligini rivojlantirish bo‘yicha zarur topshiriqlar berdi.
