Buxoro viloyatining Shofirkon tumani «qizil» hududga kiritildi va ushbu hududga kirib-chiqish to‘xtatildi. Tuman hokimligi matbuot xizmati xabar berishicha, tuman hududida shaxsiy transportda harakatlanish cheklangan.
28 maydan Shofirkonga kirib-chiqish to‘xtatilgan va koronavirusga qarshi kurash tezkor shtabi tuzilgan.
27 may kuni Shofirkon tumanida bitta oilaga mansub 7 nafar fuqaroda koronavirus infeksiyasi aniqlangandi. Bemorlar bilan bevosita muloqotda bo‘lgan fuqarolardan dastlabki test namunalari olinmoqda. Shofirkonda ko‘chalar dezinfeksiya qilinmoqda.
Tuman markazida joylashgan Star Market supermarketida koronavirusga gumonlangan shaxslar kirib-chiqqani aniqlangani bois 24 maydan shu kunga qadar ushbu savdo majmuasiga kelgan fuqarolar tuman sanitariya epidemiologiya osoyishtalik markaziga (tel.(65)502-26-57 va (91)449-69-83) murojaat qilib, tegishli tahlillardan o‘tishlari zarurligi so‘ralgan.
Ma'lumot uchun, Shofirkon tumani may oyi boshida maxsus komissiya tomonidan «yashil» hududlar qatoriga kiritilgan. Buxoro viloyatida ham 9 maydan koronavirusga chalinganlar aniqlanishi to‘xtagan, 22 may kuni ushbu viloyatda aniqlangan so‘nggi bemor ham tuzalib, viloyat koronavirusdan xoli hududga aylangandi.
