15:56 / 06.06.2020
4468
Танқидга муносабат: Ургут-Булунғур йўлини асфальтлаш бошланди

2019 йил 9 декабрда Kun.uz'да «Ургут йўлсозларидан «инновацион ғоя»: республика аҳамиятидаги йўлни шағал билан ҳам таъмирлаш мумкин», номли мақола эълон қилинган ва унда республика аҳамиятига эга бўлган Ургут-Булунғур автомобиль йўлининг Ургут тумани Испанза қишлоғидан ўтган қисми абгор аҳволдалиги ҳикоя қилинганди.

Мақолага муносабат билдирган Самарқанд вилоят автомобиль йўллари ҳудудий бошқармаси Ургут-Булунғур 4R йўлини таъмирлаш 2020 йилги режага киритилишини маълум қилганди.

Шу кунларда Ургут-Булунғур йўлининг айнан Kun.uz'да танқид қилинган Испанза қишлоғидан ўтган қисмида таъмирлаш ишлари бошланган. Йўлнинг ушбу участкасида асфальт ётқизиш ишлари олиб борилмоқда.

«Ургут-Булунғур 4R республика аҳамиятидаги йўл ҳисобланади. Бугун ушбу йўлнинг 36-53 километрлари оралиғида таъмирлаш ишларини бошлаб юбордик. Бу учун Молия вазирлиги қошидаги йўл жамғармасидан 1,3 миллиард сўм маблағ ажратилган. Жорий йил иккинчи чоракнинг якунигача ўзимизга белгиланган барча таъмирлаш ишларини якунлаймиз», дейди Ургут туман йўллардан фойдаланиш унитар корхонаси раҳбари Эшмаҳмад Облоёров Kun.uz мухбири билан суҳбатда.

Top