Starbucks 400ta qahvaxonani yopadi va biznes modelini o‘zgartiradi

Starbucks keyingi 18 oy ichida AQShda 400tagacha qahvaxonani yopish rejalari haqida e'lon qildi. Bu haqda Qimmatli qog‘ozlar va birjalar bo‘yicha komissiyasiga yuborilgan arizada aytiladi. Kompaniya prezidenti Kevin Jonson imzolagan maktubda ta'kidlanishicha, kompaniya Starbucks Pickup deb nomlangan qahvaxonalarning yangi formatini joriy qilmoqda.

Starbucks Pickup qahvaxonalari qahvani oldindan buyurtma qilish va unga Starbucks mobil ilovasi orqali pul to‘lashni afzal ko‘ruvchi mijozlarga, shuningdek Uber Eats orqali buyurtmalarini qabul qilib olishni istovchilar uchun mo‘ljallangan. Xatda shuningdek, Starbucks mobil buyurtma texnologiyasini rivojlantirish, aloqasiz ushlash texnologiyasini joriy qilishni va an'anaviy qahvaxonalarga tashrif buyuruvchilar sonini kamaytirishni rejalashtirayotgani aytilgan.

Tahlilchilar bunday qadamni qahva gigantining an'anaviy biznes-modeli fonida radikal deb atashdi. Sobiq bosh direktor Govard Shuls brendni qahvaxonalar mijoz uchun «uchinchi o‘rin» - uy va ishdan tashqari, do‘stlar bilan muloqot qilish, ishlar haqida kelishish yoki shunchaki vaqtni yaxshi o‘tkazadigan noyob joy sifatida yaratgandi.

O‘z navbatida, yangi xatda kompaniya yangi formatni ishlab chiqish va umuman biznes-modelni o‘zgartirish g‘oyasi koronavirus pandemiyasidan oldin paydo bo‘lganligini tushuntirdi.

«COVID-19 tarqalishidan oldin, AQShda Starbucks qahvaxonalaridagi operatsiyalarning taxminan 80 foizi avtomatik amalga oshirilayotgan edi. Bu dinamika bizning boshqaruv guruhimizni AQShdagi strategiyani qayta ko‘rib chiqishga undadi va chakana savdoda uzoq muddatli ishtirokimizni qanday rivojlantirishimiz mumkinligi aniqlandi», - deyiladi xatda.