Superliga karvoni yana yo‘lga otlanmoqda. «Nasaf» - «Navbahor» va turning yana 6 intrigasi

«SO‘G‘DIYoNA» — «PAXTAKOR»
O‘yin boshlanish vaqti: 18:00

TV-translatsiya: «Sport» (jonli)

Yakshanba kungi bahsda Ulug‘bek Baqoyev boshchiligidagi «So‘g‘diyona» Shota Arveladze qo‘l ostidagi «Paxtakor»ga qarshi saf tortadi. Jizzax klubi mavsumni muvaffaqiyatsiz boshlab 13-o‘rinda turibdi, «Paxtakor» esa peshqadam sanaladi. Bu bahsda ishtiyoq va intizom tajribani mag‘lub etishga urinadi. Har holda o‘tgan mavsum 4-o‘rinni olgan Jizzax klubi ketma-ket 4-o‘yinda ham muvaffaqiyatsiz natijaga rozi bo‘lmasa kerak. Biroq, statistika to‘liq mehmonlar tarafida: «So‘g‘diyona» 21 yildan buyon «Paxtakor»ni o‘z maydonida mag‘lub eta olgani yo‘q. Amaldagi chempion jamoa Jizzaxda so‘nggi marta 1999 yilda taslim etilgan (2:3).

Jizzaxdagi oxirgi 3 o‘yin:

2019 yil: «So‘g‘diyona» – «Paxtakor» - 1:2 

2018 yil: «So‘g‘diyona» – «Paxtakor» - 0:1 

2017 yil: «So‘g‘diyona» – «Paxtakor» - 0:1 

«NASAF» — «NAVBAHOR»
O‘yin boshlanish vaqti: 20:00

TV-translatsiya: «Sport» (jonli)

Turning markaziy o‘yini Qarshida «Nasaf» va «Navbahor» o‘rtasida kechadi. Bugungi kunda moliyaviy jihatdan bir-biri bilan raqobatdosh klublarga aylangan Qashqadaryo va Namangan viloyatining bosh jamoalari o‘rtasidagi bahs qizg‘in ko‘rinish olishi aniq. Berdiyev mavsumni g‘alabalar bilan davom ettirmoqda, Kanchelskis esa ikki marta ochko yo‘qotishga uchradi. Vohadagi o‘yin bu jamoalarning mavsumdagi imkoniyatlarini ochib bersa ajabmas. E'tiborlisi, Namangan klubi so‘nggi ikki yildan buyon Qarshida mag‘lubiyatga uchragani yo‘q – bir g‘alaba va bir durang. Qolaversa, Kanchelskis va uning jamoasi pandemiya davrida ham Namanganda tayyorgarlikni butkul to‘xtatgani yo‘q. Shunday ekan, uch o‘yinda uch g‘alabaga erishib, «Paxtakor» bilan qo‘shhokimlik o‘rnatgan «Nasaf» bu safar jiddiy qarshilikka uchrashi aniq.

Qarshidagi oxirgi 3 o‘yin:

2019 yil: «Nasaf» – «Navbahor» - 0:1 

2018 yil: «Nasaf» – «Navbahor» - 1:1

2017 yil: «Nasaf» – «Navbahor» - 4:0

15 iyun (dushanba)

«SURXON» — «MASh'AL»
O‘yin boshlanish vaqti: 18:00

TV-translatsiya: «Dunyo bo’ylab» (jonli)

Dushanba kungi Termizdagi «Surxon» va «Mash'al» o‘rtasidagi bahs ham shiddatli o‘tishiga shubha yo‘q. Murabbiylar qo‘nimsizligi davom etayotgan Termiz jamoasi uchun bahsning qadri ancha baland. Oxirgi bir yilda Mo‘minjonov, Miklyayev, Ashurmatov, Andreyevdan keyin mavsum boshida Bahrom Haydarov ish boshladi. Biroq, uning ham kursisi mustahkam emas. Shu bois bu bahsda jamoa o‘z murabbiyi uchun ham faqat g‘alabani ko‘zlashi talab etiladi. Shu kuni mezbonlar yetakchisi Shavkat Salomov jamoasiga yordam bera olmaydi. «Mash'al»ning esa debyutant sifatida yo‘qotadigan hech narsasi yo‘q. Shunday ekan, Dilyaver Vaniyev jamoasi mezbonlarga ochiq futbol taklif etsa kerak.

Termizdagi oxirgi 3 o‘yin (Pro-liga):

2018 yil: «Surxon» – «Mash'al» - 2:1 

2018 yil: «Surxon» – «Mash'al» - 1:1 

2017 yil: uchrashmagan

«BUXORO» — «ANDIJON»
O‘yin boshlanish vaqti: 18:30

TV-translatsiya: «Sport» (jonli)

Buxorodagi maydon tayyor emasligi uchun Muborakda o‘tadigan «Buxoro» va «Andijon» o‘rtasidagi o‘yin ham mezbonlar uchun katta ahamiyatga ega. Bosh murabbiy Muhsin Muhammadiyev kuni kecha O‘zbekistonga qaytib keldi va ayni damda karantinda saqlanmoqda. Jamoa legionerlari esa hali-hamon O‘zbekistonga qayta olganicha yo‘q. Klub asosan mahalliy futbolchilar bilan yangi rahbariyat boshchiligida tayyorgarlik ko‘rgan. O‘yinga jamoa qaysi murabbiy boshchiligida tushishi ham noma'lum. «Andijon» esa Viktor Kumikov qo‘l ostidagi debyut o‘yinini o‘tkazadi. Aynan ushbu bahs Muhammadiyevning «Buxoro»da qolish-qolmasligini aniqlab bersa kerak. Har holda ketma-ket safardagi 3 mag‘lubiyatdan keyingi navbatdagi muvaffaqiyatsizlik buxoroliklarning sabr kosasini to‘ldirishi tabiiy.

Buxorodagi oxirgi 3 o‘yin:

2019 yil: «Buxoro» – «Andijon» - 2:0 

2016 yil: «Buxoro» – «Andijon» - 5:2 

2015 yil: «Buxoro» – «Andijon» - 2:1 

«LOKOMOTIV» — «MeTALLURG»
O‘yin boshlanish vaqti: 19:00

TV-translatsiya: «Mahalla» (jonli).

Turning so‘nggi bahsi Toshkentda «Lokomotiv» va «Metallurg» o‘rtasida kechadi. Bu bahs aslida Bekobodda o‘tishi lozim edi. Ammo bu shahar karantin sababli «qizil» hududda ekanligi tufayli jamoalarning o‘zaro roziligi bilan PFL o‘yinni poytaxtga ko‘chirdi.

Ushbu klublar o‘rtasidagi so‘nggi o‘yinlar kutilmagan natijalarga boy bo‘lgan. Bekobod jamoasi oxirgi ikki o‘yinda «Lokomotiv»dan ochko tortib oldi. Ko‘ramiz, bu safar ham «temiryo‘lchilar»dan ochko tortib olinarmikan?

Toshkentdagi oxirgi 3 o‘yin:

2019 yil: «Lokomotiv» – «Metallurg» - 1:1

2018 yil: «Lokomotiv» – «Metallurg» - 1:0

2017 yil: «Lokomotiv» – «Metallurg» - 3:1.

 U. Ibodov tayyorladi.

Superliga 3-turidan keyingi turnir jadvalidagi holat: