Surxondaryoga koronavirus qaytdi, jami holatlar soni 5 mingga yaqinlashdi

«2020 yil 14 iyun soat 10:00 holatiga ko‘ra, O‘zbekistonda koronavirus infeksiyasi qayd etilganlar soni 4994 nafarni tashkil etmoqda.

Yangi kasallanish holatlarining 7 nafari karantin markazidagi (barchasi xorijdan kelgan) fuqarolar orasida, 10 nafari Toshkent viloyatida (shundan 4 nafari xalqaro yuk tashuvchi avtomashina haydovchisi, 6 nafari koronavirusga chalinganlar bilan muloqotda bo‘lib karantinga olingan), 9 nafari Surxondaryo viloyatida hamda 2 nafari Buxoro viloyatida aholi orasida aniqlangan», deyiladi xabarda.

13 iyun kuni 97ta yangi holat qayd etilib (shundan 5 nafari aholi orasida), 116 bemor tuzaldi va shu vaqtgacha tuzalganlar soni 3874 nafarga yetdi.

Hozirda shifoxonalarda 1101 bemor davolanmoqda. Ulardan 12 nafari og‘ir, 2 nafari esa o‘ta og‘ir ahvolda.

• Eslatib o‘tamiz, Surxondaryo viloyatida mart oyidan buyon 44ta kasallanish holati qayd etilgan, bemorlardan biri vafot etdi, 43 nafari tuzaldi, bemorlarning so‘nggisi 20 may kuni tuzalgan va viloyat koronavirusdan xoli hududga aylangandi.
• Bungacha Navoiy, Buxoro, Xorazm va Qashqadaryo viloyatlarida ham koronavirusga chalinganlarning barchasi tuzalib, ushbu hududlarda bemor qolmagan, ammo keyin yana yangi holatlar aniqlana boshlagandi. Ayni vaqtda faqat Jizzax va Farg‘ona viloyatlari koronavirusdan xoli hududlar bo‘lib qolmoqda.