Isroilda tibbiyot hamshiralari maoshlari oshirilishini talab qilib ish tashladi

Isroilda mehnat haqi oshirilishini talab qilgan tibbiyot hamshiralarining ish tashlashi boshlandi. Bu haqda The Jerusalem Post nashri xabar berdi.

 Qayd etilishicha, aksariyat hamshiralar koronavirus yuqtirgan bemorlar davolanayotgan yuqumli kasalliklar shifoxonalariga ishga jo‘natilgan. Shuningdek, ko‘plab tibbiyot xodimlari karantinda bo‘lganligi sababli qolganlar ikki baravar yuklama bilan ishlamoqda.

Ish tashlash vaqtida kasalxonalarning koronavirus bo‘limlarigina ishlaydi, shuningdek, bemorlarga tezkor yordam beruvchi navbatchi hamshiralar ham ishda bo‘ladi.

 Oxirgi ma'lumotlarga ko‘ra, Isroilda koronavirus yuqtirganlar soni 50 mingdan oshgan, 21 mingdan ortiq kishi sog‘ayib ketgan. Vafot etganlar soni 400dan oshgan.