Rossiya Mudofaa vazirligi ko‘ngillilarda COVID-19’dan vaksina sinovlarini yakunladi

20 iyul, dushanba kuni koronavirusdan vaksinaning klinik sinovlarida qatnashgan ko‘ngillilarning so‘nggi guruhi Burdenko nomidagi harbiy gospitaldan chiqariladi, dedi Rossiya qurolli kuchlari Radiatsion, kimyoviy va biologik himoya qo‘shinlarining 48-markaziy ilmiy-tadqiqot instituti rahbari, Rossiya Fanlar akademiyasi muxbir a'zosi, biologiya fanlari doktori, professor, tibbiyot xizmati polkovnigi Sergey Borisevich «Krasnaya Zvezda» gazetasiga bergan intervyusida.

Guruh 20 kishidan iborat edi. Ularda Mudofaa vazirligi va N.F. Gamaleya nomidagi Milliy epidemiologiya va mikrobiologiya tadqiqot markazi tomonidan birgalikda ishlab chiqarilgan vaksina sinab ko‘rildi.

«Olimlar hali katta hajmdagi tahliliy ishlarni bajarishi, yakuniy hisobotlarni tayyorlashi, natijalarni taqdim etishi, vaksina preparatini davlat ro‘yxatidan o‘tkazishi lozim. Ammo, hozir mavjud tahlil ma'lumotlari shuni tasdiqlaydiki, emlash natijasida ko‘ngillilarda koronavirusga qarshi zarur antitanachalar aniqlandi, vaksina tarkibiy qismlari esa odamlar uchun xavfsiz va yaxshi qabul qilinadi», - deya izoh berdi Borisevich klinik tadqiqotlar natijalariga.

Shuningdek, u organizmga koronavirusga qarshi immunitet beradigan antitanachalar vaksina yuborilganidan keyin uzoq vaqt davomida saqlanib qolishini aytdi. «Ebola bezgagiga qarshi ikkita va Yaqin sharq respirator sindromiga qarshi bitta vaksina ishlab chiqilgan platformaning imkoniyatlari emlashdan keyin hosil bo‘lgan himoya titrini uzoq muddat saqlashga imkon beradi», - dedi Borisevich.

Tadqiqotlar davomida qo‘zg‘atuvchini miqdoriy baholash metodologiyasidan foydalanildi, u 48-markaziy ilmiy-tadqiqot institutida ishlab chiqilgan, deya aniqlik kiritdi institut rahbari. Shuningdek, shifokorlar laboratoriya modelini qo‘lladilar, u dorilarning himoya samaradorligini baholash uchun kasallikning kechishini ko‘rishga imkon berdi.

Burdenko nomidagi gospitalda ko‘ngillilar uchun klinik sinovlar 18 iyun kuni boshlandi. Vaksinani qabul qilgan birinchi guruh 18 kishidan iborat edi. Ikkinchi guruhga preparat birinchi klinik tadqiqotlar natijalari keyingi tadqiqotlarga imkon berganidan bir necha kun o‘tgach berildi.

Iyun oyining oxirida ko‘ngillilar o‘zlarini yaxshi his qilayotganliklari haqida xabar qilishdi, hech qanday asoratlar yoki nojo‘ya ta'sirlar aniqlanmagan.