Ayo Sofiyaning ibodatga ochilishi munosabati bilan bugun erta tongdan odamlar juma namozini ado qilish maqsadida Ayo Sofiya masjidi tomon yo‘l olishdi.
Ba'zi yo‘llar harakat uchun yopildi
Ayo Sofiya qayta ochilgani sababli Istanbul shahrining ba'zi yo‘llarida transport harakati to‘xtatildi. Xususan, Otaturk xiyoboni, G‘oziy Mustafo Kamol Posho ko‘chasidan to Tarixiy yarimorolga qarab ketgan barcha yo‘llarda, shuningdek, Galata ko‘prigi, Kennedi, Reshadiye, Ragip Kumushpala prospektlariga olib boradigan yo‘nalishlarda transport vositalari harakati vaqtincha to‘xtatildi.
Yevroosiyo tunneli esa ochiq qoldirildi. Dengiz, metro va marmaray xizmatlarida (Istanbulning Osiyo va Yevropadagi qismlarini bog‘lagan va bo‘g‘oz ostidan o‘tgan temir yo‘l liniyasi) harakat davom etdi. Boyazid va Emino‘nu bekatlari orasidagi tramvay harakati dushanba kuni soat 06:00ga qadar to‘xtatilgan.
Ayo Sofiya nimasi bilan muhim va nega tortishuvlarga sabab bo‘lmoqda?
Tayyorgarlik ishlari
Istanbul hokimiyati tomonidan berilgan ma'lumotlarga ko‘ra, Ayo Sofiya va uning atrofida ayollar uchun ikkita (Mehmet Akif bog‘i, Sultonahmet maqbarasi yonidagi maydon), erkaklar uchun esa uchta ochiq maydon (Ayo Sofiya maydoni, Sultonahmet maydoni va Bazilika prospekti) namoz o‘qish uchun ajratildi.
Ayo Sofiya juma namoziga qanday tayyorlandi? Mozaikalar masalasi qanday hal qilindi?
Namoz o‘qiladigan joylarga Boyazid maydoni, Sirkei va Chattikapi orqali kirildi.
Bu joylarga kirish politsiya tomonidan 11ta nazorat punkti orqali amalga oshirildi. Tekshirish punktlaridan tez va oson o‘tilishini ta'minlash uchun odamlardan o‘zlari bilan sumka olib kelmaslik so‘ralgandi.
