Jizzax viloyati hokimiga yangi o‘rinbosar tayinlandi

Jizzax viloyati hokimining 2020 yil 30 iyuldagi qaroriga asosan viloyat hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari etib Furqat Jo‘raqulov tayinlandi. Bu haqda viloyat hokimligi xabar bermoqda.

F.Jo‘raqulov 1980 yilda Sirdaryo viloyati Oqoltin tumanida tug‘ilgan. 2001 yilda O‘zbekiston Milliy universiteti, 2003 yilda O‘zbekiston Milliy universiteti hamda 2012 yilda Toshkent davlat iqtisodiyot universitetini tamomlagan. Mehnat faoliyatini 2003 yildan O‘zbekiston Milliy universiteti jahon falsafasi tarixi va mantiq kafedrasi o‘qituvchiligidan boshlagan. 

Furqat Jo‘raqulov o‘tgan yillar mobaynida ta'lim tizimi hamda mahalliy ijro hokimiyatining turli xil lavozimlarida faoliyat olib borgan. 2018 yildan bugungi kunga qadar Jizzax Davlat pedagogika instituti o‘quv ishlari bo‘yicha prorektori lavozimida ishlab kelgan.

2017 yildan buyon viloyat hokimining yoshlar siyosati, ijtimoiy rivojlantirish va ma'naviy-ma'rifiy masalalari bo‘yicha o‘rinbosari bo‘lib ishlab kelayotgan Botir To‘xtamishev Jizzax Davlat pedagogika instituti o‘quv ishlari bo‘yicha prorektori lavozimiga tayinlandi.